Escenario de batallas navais e naufraxios, refuxio de turistas e artistas, fogar de pescadores, piratas, baleeiros, narcotraficantes...e Cristóbal Colón? As costas de Galicia gardan miles de historias e segredos que a xornalista e escritora Noemí Sabugal trata de desentrañar en 'Labirinto mar: Unha viaxe pola vida e a historia das nosas costas' (Alfaguara). A escritora leonesa, aproveitando o percorrido de presentación que a tivo o martes en Santiago e que este mércores a levará até a libraría Moito Conte da Coruña ás 19:30 horas, atendeu a Galiciapress para falar da súa última obra, do litoral galego e de todas as súas ameazas, desde a falta de substitución xeneracional na pesca até os riscos medioambientais que supoñen empresas como Altri ou o tráfico de grandes petroleiros nas rutas marítimas.