O ministro de Cultura, preocupado polo impacto de Altri sobre o Camiño de Santiago, pide audiencia con Rueda

O ministro de Cultura, Ernest Urtasun, solicitou por carta ao presidente da Xunta, Alfonso Rueda, unha reunión para analizar o posible impacto de Altri no Camiño de Santiago.
 

Na misiva, escrita en galego, o responsable estatal sinala que o proxecto Gama (participado polas empresas Altri e Greenalia) está a xerar "unha ampla resposta social" e que "pode supor unha ameaza para sectores crave no territorio como é o turismo e o sector primario e, o que resulta aínda máis preocupante, para a saúde da poboación e os ecosistemas da zona".

Ademais, lémbralle que a Unesco expresou en 2024 a súa "preocupación" polos efectos que iniciativas desta natureza poderían ter sobre o ben declarado. Apunta ademais a necesida de observar as Directrices Operativas da Convención de Patrimonio Mundial e de remitir, con carácter previo, a correspondente Avaliación de Impacto Patrimonial.
 

A este respecto, agradécelle que, "tras as reiteradas solicitudes por parte deste Ministerio", a Xunta remitise recentemente a documentación requirida que, indica, xa foi trasladada ao Centro de Patrimonio Mundial para a súa análise.
 

"Dada a magnitude do proxecto e a súa posible afección a un ben de tan alto valor cultural, propóñolle a celebración dunha reunión técnica entre ambas as administracións, co obxectivo de examinar pormenorizadamente o alcance da intervención proxectada e garantir, desde a máxima cooperación institucional, a apropiada protección do Valor Universal Excepcional do Camiño de Santiago", reclama.

Por último, sinala que permanecen á espera do preceptivo ditame do órgano consultivo da Unesco, Icomos Internacional, "antes de que poidan adoptar decisións definitivas sobre a situación".