Jácome desconvoca o pleno extraordinario do próximo luns e o BNG acúsao de actuar "por interese persoal"
De "tomadura de pelo" cualifican os nacionalistas a decisión adoptada desde o goberno local ourensán
O goberno local de Ourense desconvocou o pleno extraordinario que estaba previsto para o vindeiro luns, día 18, mentres que convocou a comisión de pleno para o martes, día 19, ás 08.30 horas.
Tras facer pública esta decisión, o portavoz do grupo municipal do BNG, Luís Seara, acusou ao alcalde, Gonzalo Pérez Jácome, de "xogar coa institución por puro interese persoal".
"E para desviar a atención dos seus problemas xudiciais porque o orzamento lle importa entre cero e nada", asevera ante a suspensión do pleno extraordinario convocado inicialmente para o luns para abordar a aprobación inicial do proxecto de orzamentos para o presente exercicio.
De "tomadura de pelo" cualifican os nacionalistas a decisión adoptada. "O alcalde está a faltarlle ao respecto non soamente á oposición senón tamén aos veciños no seu conxunto, ademais de banalizar até o extremo a institución", apostila.
Escribe o teu comentario