Sobreseída a acusación contra cargos da Mesa en Padrón

A decisión da xuíza de arquivar o caso supón un respaldo para os defensores do uso do galego na administración. O procedemento xudicial iniciouse por mor dunha denuncia da Policía Local de Rianxo, que acusaba a Maceira e a Seco de inxurias polas súas manifestacións públicas en apoio ao veciño multado. Con todo, a maxistrada determinou que non existen elementos suficientes para continuar adiante co proceso.

Desde a Mesa pola Normalización Lingüística considérase que a actuación policial foi desproporcionada e que a denuncia perseguía intimidar a quen defenden os dereitos lingüísticos da poboación galega. A entidade sostén que este tipo de accións poden supor unha ameaza para a liberdade de expresión e para o exercicio do dereito a comunicar en galego no ámbito público. A sanción inicial de 600 euros imposta ao veciño de Rianxo tamén foi anulada, aínda que finalmente foi sancionado con 160 euros por falta de respecto á Policía Local.

O arquivo da causa contra Maceira e Seco prodúcese nun contexto no que a defensa do galego volveu a situar no centro do debate político, tras coñecerse que a lingua do propia do país é minoritaria por vez primeira. 

Tras o arquivo da causa, a Mesa pola Normalización Lingüística instou á Policía Local de Rianxo a mellorar a formación dos seus axentes en materia de dereitos lingüísticos e de atención cidadá conforme á lexislación vixente. A organización ofrece a súa colaboración para impartir formación específica, considerando que este esforzo sería menor que o dedicado á elaboración de extensos informes policiais en busca de delitos inexistentes.