O populismo, que non política de Abel Caballero

Preséntese ás próximas eleccións autonómicas, póñase a disposición do seu partido, como militante histórico do mesmo, e salve aos socialistas galegos

As luces de Nadal en Vigo custaron 3,3 millóns de euros, entre os anos 2023 e 2024. Abel Caballero fai populismo co presidente da Xunta, pero tamén co presidente da Federación Española de Fútbol, o señor Louzán, todo lle serve con tal de manter o seu papado na cidade de Vigo.

Señor Caballero, por que ese populismo non o traslada ao resto de Galicia? A vostede pásalle o mesmo que a Paco Vázquez, exalcalde da Coruña, aínda que con máis talla política. Critica á Xunta, pero é vostede un localista e populista radical, e que insulta a intelixencia da xente, a que lle vota e a que non lle vota.

Nas súas posicións demagóxicas consegue ter unha maioría absoluta en Vigo, pero á vez crea animadversión no resto de Galicia. Presentar ás próximas eleccións autonómicas, pór a disposición do seu partido, como militante histórico do mesmo, e salve aos socialistas galegos dunha enfermidade crónica da que non se recuperan desde a preautonomía.

Por mor da restauración da democracia, en Galicia o PSdeG-PSOE tivo once secretarios xerais e nove candidatos á presidencia da Xunta, gobernando nunha lexislatura e medio mandato de González Laxe, e de chiripa, por unha ambición política, á vez que un capricho de José Luís Barreiro Rivas, e mediante unha moción de censura en 1987, presentada polos propios socialistas galegos.

Señor Abel Caballero, é o seu populismo e localismo capaz de resolver o problema de personalismos que afecta á súa formación? Vostede pertence a un partido de ámbito estatal, e postos a ser localista, permítame que lle diga que non está á altura do estrañado concelleiro Leri, xa que a ambición deste último empezaba e acababa no seu querido Vigo; vostede saboreou outros cargos na política nacional.

Vostede non é o PSOE, é Abel Caballero, cun localismo que critica nas demais cidades de Galicia, empezando por Pontevedra, á cal ignora, pero despois faise o ofendido cando a Real Federación Española de Fútbol non inclúe á súa cidade como unha das próximas sedes do Mundial.

Vigo é, por economía, poboación e industria, a máis importante de Galicia, pero á vez carece doutras peculiaridades, das que gozan outras cidades, como a veciña Porto, Madrid, Santiago, Barcelona, e até Pontevedra, peculiaridades que vostede ignora por propio interese electoral. Vigo é unha gran cidade, que sen dúbida o é, como o son as anteriormente citadas. 

Entendo que ao alcalde vigués o presidente da Xunta, Alfonso Rueda, e o señor Louzán, da RFEF, non lle sexan da súa simpatía, pero do tres, o único populista é vostede. Co seu electorado, desde logo, funciónalle.