O Festival Fisterra Experience anuncia a Mondra, Baiuca ou Helena Egea no seu primeiro avance
O festival anunciou unha nova edición para os días 27, 28 e 29 de xuño.
Xa non hai que esperar máis e agora o que toca é dar présa para facer cunha entrada. O Festival Fisterra Experience fíxose de rogar nesta ocasión pero, por fin, presentou as súas datas para a nova edición deste 2025, que se celebrará do 27 ao 29 de xuño na Costa da Morte, onde soarán algúns dos mellores artistas do territorio.
CONCERTOS EN BARCO E FUTBOLINES
Con tres días de música debaixo do brazo, a organización destaca que esta é "unha proposta única" pola fusión da música e a paisaxe nunha contorna onde a mestura permite vivir ao espectador "unha experiencia cultural completa". "É unha invitación a vivir a cultura desde un lugar extraordinario, no que o Atlántico e a costa crea un escenario natural incomparable", apuntan.
Se xa o lugar resulta atractivo de seu, a proposta musical non queda atrás. Á chamada para esta nova edición acudiron Baiuca, un dos artistas con máis proxección internacional de toda a escena galega, Mondra, un artista revolucionario capaz de redimensionar a música tradicional, ou Helena Egea, unha das voces máis singulares e que máis darán que falar durante o verán en Galicia.
A esta lista hai que sumar a DJ Mil, MFC Chicken, A Predeira ou Phonorama, que son as primeiras das moitas confirmacións que quedan por dar a coñecer nos próixmos días nun evento que aposta por "a fusión da creación conltural co espazo que a acolle", con propostas que van desde concertos en barco até torneos de futbolín para pór en valor todo o que ten que ofrecer a Costa da Morte.
Escribe o teu comentario