O Concello ourensán de Os Blancos vai ser intervido pola Deputación como consecuencia da situación de quebra na que se atopa, cunha débeda por encima do 300 % dos seus recursos ordinarios, aínda que este endebedamento non debeu acertar coas necesidades dos seus veciños pois lonxe de asentar poboación perdeu o 30 % dos seus habitantes nos últimos 15 anos, máis do dobre que o resto de municipios da comarca da Limia na que se encadra. Pero a pesar da súa situación crítica, que vén arrastrando desde hai anos, o Concello non puxo practicamente nada do seu parte para solucionala. Así, os recursos propios son os máis baixos de toda a comarca, representando en 2016 escasamente o 30 % do total cando o resto de municipios limianos situáronse en case o 44 % e os seus custos de persoal sitúanse preto da metade dos seus gastos, crecendo un 12,45 % con respecto ao seu orzamento nos últimos 15 anos, case ao mesmo ritmo que o resto de Concellos da súa comarca cunhas economías máis saneadas.

Coa intervención parece que Os Blancos podería acceder a un crédito do ICO de 1,7 millóns de euros para saldar as súas débedas coa Seguridade Social e con Facenda, o que supón pasar a débeda dun capítulo a outro, pero esta segue existindo. O seu Alcalde manifestou que en 10 anos serán totalmente solventes, pero as contas non dan, xa que, no mellor suposto de que nese prazo liquidasen esta débeda estarase a referir á que van contraer co ICO pero quedará pendente case outro tanto que lle deben a provedores e bancos, co que pasarán, polo menos, 5 lexislaturas nas que os políticos locais non teñan nada que prometer porque tampouco terán nada que facer, xa que os seus veciños só recibirán os servizos mínimos obrigatorios e estes serán prestados desde a Deputación, co agravante de que serán os que paguen os impostos municipais máis altos de Galicia, e probablemente de España, a cambio de recibir os menores servizos. E todo iso para acabar, unha vez pasados moitos anos e saneadas as súas contas, a volver asumir os custos dos 6 traballadores que agora pasan á Deputación, ou os que queden se teñen a sorte de que se xubilen algúns durante ese período, así como o posto, aínda que sexa en acumulación, do Secretario-Interventor. Pero a maiores terá que volver facerse cargo da factura do abastecemento de auga, saneamento, iluminación, pavimentación de vías públicas, etc., e todo iso nunha situación case desértica, pois se temos en conta que do 30 % de poboación perdida nos últimos 15 anos case a metade, o 13 %, foi desde a subida de impostos que entrou en vigor en 2013, coa que se vai a aprobar para 2018 e seguintes é previsible que o descenso se acentúe, e en 20 anos Os Blancos teña, aproximadamente, a metade da poboación actual, e con iso a metade de ingresos do Estado, co que podemos concluír que desde o minuto 1 que recupere a súa autonomía local empezará a xerar novamente débeda. Polo que, sendo claro na mensaxe, non estamos ante unha quebra senón ante un Concello errado.

A solución pasa inevitablemente pola fusión de Os Blancos con Xinzo de Limia, por ser o seu destino natural. Sei que aos habitantes deste municipio que estean a ler isto puxéronselles os pelos como escarpias. Pero que non renda o pánico, hai unha fórmula na que todos saen beneficiados:

En primeiro lugar, os 6 traballadores que agora van ir á Deputación seguirán prestando os seus servizos na súa contorna natural, para o que ao orzamento de Xinzo sumaranse os máis de 800.000 euros de Os Blancos, co aforro que supón pechar a súa Casa Consistorial así como non ter que facer fronte ao pago da débeda con cargo a el. A maiores, a participación do Estado polos 850 habitantes dos Blancos incrementarase con respecto á actual, ao computar como pertencentes a un Concello de máis de 5.000 habitantes, e a suma cos de Xinzo, en total 10.854 do Concello resultante, tería un plus dun 10 % adicional por xurdir dunha fusión. Todo iso supoñería un aumento aproximado de ingresos de 200.000 euros anuais, ademais de ter prioridade en todas as convocatorias de subvencións.

E que sucede coa débeda? A Xunta de Galicia ten aprobado un Fondo Adicional ao de Cooperación Local destinado, entre outros, ao financiamento de Concellos fusionados, e que en 2017, para estes, tiña unha dotación de máis de 1.3 millóns de euros que se repartiron entre os de Oza-Cesuras e Cerdedo-Cotobade, polo que, de fusionarse Xinzo cos Blancos entraría nesta repartición, correspondéndolle máis de 400.000 euros por ano, que sumados ao aumento de ingresos citado supoñería liquidar a súa débeda total en menos de 6 anos, a cambio de que non só os veciños de Xinzo non terían que facer ningún esforzo adicional, ao contrario, senón que mesmo os dos Blancos verían mellorado o seu nivel de vida ao ampliárselles a carteira de servizos nada menos que a todos os que actualmente teñen os de Xinzo, mesmo con certa rebaixa de impostos ao ser inferiores os deste que os actuais dos Blancos.

Do que se trata é de mirar aos veciños, e ten mala explicación condenarlles a un Concello caro e sen futuro cando poderían gozar desde xa de máis e mellores servizos con menor carga impositiva. Isto si que previsiblemente poida frear o despoboamento, xa que todos poderían seguir vivindo na súa contorna ao pertencer a un mesmo Concello, viable e saneado.