Outra oportunidade perdida para a Administración Local

Na OPE 2017 faltan prazas de funcionarios con Habilitación Nacional.

Con motivo da Oferta Pública de Emprego de 2015 xa escribín un artigo moi similar a este e tristemente coa de 2017 teño que volver facelo, referido á cobertura de prazas de Funcionarios de Administración Local con Habilitación Nacional, que aínda que non somos uns funcionarios moi coñecidos, con todo, somos os encargados nada menos que de exercer os controis internos na Administración Local ao ter encomendado o asesoramento legal, o control e fiscalización da xestión económico-financeira e orzamentaria, así como a contabilidade, tesourería e recadación, ocupando os postos de Secretarios, Interventores e Tesoureiros.

Estes funcionarios, aínda que prestamos servizos en Concellos e Deputacións, non formamos parte dos seus cadros de persoal, senón que estamos adscritos ao Estado co suposto obxecto de reforzar a nosa independencia con respecto ás Entidades Locais nas que prestamos servizos. Pero isto é máis literatura que realidade, porque se segue mantendo a nosa dependencia económica das Corporacións Locais nas que estamos destinados, e mesmo interveñen nos nosos nomeamentos, sobre todo nos municipios de máis de 75.000 habitantes onde non se suprimiu o sistema de libre designación, co que o ataque á independencia non pode ser máis completo: dependencia económica e dependencia, mesmo, á opción ao propio posto de traballo.

Despois de que desde o Ministerio de Facenda e Función Pública se dixesa ata a saciedade que se ían reforzar os controis municipais reforzando a nosa independencia, sobre todo na función interventora así como na de tesourería, facendo obrigatorio que existise un funcionario que se encargase dela en todos os Concellos, esquecéndose de que na maioría deles, polo seu reducido tamaño e orzamento, non poden pagalo, a resposta do Ministro Montoro, do mesmo xeito que hai 2 anos, foi a inclusión na Oferta Pública de Emprego para 2017 outra vez dun número absolutamente insuficiente de prazas para cubrir non só as vacantes que existen actualmente senón tamén os postos de tesourerías, de nova creación con esa medida.

Actualmente hai un importante número de vacantes de prazas reservadas a Funcionarios de Administración Local con Habilitación Nacional que están cubertas por funcionarios, e en ocasións por persoal laboral, que non teñen nin a formación nin a habilitación, e aínda que en moitos casos o fan de boa fe para evitar prexuízos aos seus Concellos, noutros hai unha auténtica conivencia entre quen ocupa a praza e os respectivos Alcaldes. Alguén se imaxina un ATS exercendo de médico, por moi boa vontade que lle poña, ou que se preferise que o posto o ocupase un ATS en lugar dun médico?, pois iso é o que está a pasar hoxe en día nos nosos Concellos.

O triste é que o que acaba de facer o Ministerio non é por razóns económicas, xa que cubrir todas as vacantes non supoñería aumento algún do gasto público. En primeiro lugar non debería preocuparlle, porque a ningún destes funcionarios lles paga o Estado senón os seus respectivos Concellos, pero é que quen está ocupando as prazas irregularmente xa cobran por iso, polo que cubrilas co funcionario a quen lle corresponde non aumentaría o gasto, ademais de que sería moito mellor pagar polo orixinal que non por unha copia. E naqueles sitios nos que deliberadamente se manteñen os postos vacantes non é que haxa un aforro senón que se están gastando o diñeiro noutras cousas en lugar de en aqueles que teñen encomendado legalmente o control interno do Concello. Por algo será. Pero é que a falta de compromiso do Ministerio, mesmo coa súa palabra dada, pola reincidencia no seu comportamento convérteno en cooperador necesario desta situación nada edificante.

A esencia da democracia non é que cada quen faga o que lle dá a gana, senón que se cumpran as normas que permitan poder facer o que queiramos respectando os dereitos dos demais. É precisamente ese respecto ás normas o que garante a nosa igualdade. E o aval do dito cumprimento é a existencia de controis e dos funcionarios encargados de exercelos, polo que manter a actual situación non lle beneficia a ninguén. Ou si?