O concello de Sarria suspende pagos a provedores e empregados

|

Calculadoracuentaspresupuestosgastos


A alcaldesa de Sarria, a socialista Pilar López, ameazou este martes con "plantarse" ante o Ministerio de Facenda se non se lle habilita un tesoureiro que desbloquee a situación de falta de pagamentos en que se atopa o Concello.


Así, Pilar López advertiu que, ademais de quedar sen cobrar "provedores e todas as taxas que teña que pagar o Concello", inmobilízase "a actividade diaria do Concello porque, nestes momentos, non existe a figura do tesoureiro nin para pagos, nin para ingresos, nin para nada que teña que ver con movemento de diñeiro".


Respecto diso, a alcaldesa lembra que este problema non é de agora. "Cando chegamos en xuño de 2015, entraba en vigor esta lei que obriga aos concellos menores de 20.000 habitantes a ter tesoureiro habilitado con carácter nacional", explicou.


Neste sentido, incidiu en que o seu grupo de goberno, en minoría, tentou crear esa figura, e levou este asunto a dous plenos onde a oposición do PP, xunto con dous concelleiros non adscritos (ex Compromiso por Galicia), botaron para atrás a creación da devandita praza.


PLENO


Para este xoves convocouse outro pleno, pero a rexedora avisou de que "a praza non se crea instantaneamente" e haberá que esperar "dous ou tres meses" para tela.


Á vista de que "non" pode ter o Concello paralizado tres meses, indicou que falou coa subdirectora de Relacións con outras Administracións do Ministerio de Facenda, que se comprometeu "no menor tempo posible a buscar unha solución".


NÓMINA DE XANEIRO


Por iso, Pilar López puntualizou que ata "agora" está todo pago, aínda que periga a nómina dos funcionarios do mes de xaneiro, polo que convocou unha reunión co persoal para comunicarlles esta "continxencia".


Nesta liña, confía en que o Ministerio chame incluso "hoxe e din que buscaron unha solución". "Por parte do Concello fíxose todo o habido e por haber para non chegar a esta situación. A solución non depende de nós. A oposición non considerou necesario nin prioritaria a creación desta praza", escusou Pilar López.



Pero pode non ser o último caso en Galicia. A Federación Galega de Municipios e Provincias (Fegamp) alertou ante as dificultades que teñen os concellos para poder cubrir as prazas de tesoureiro municipal polo feito de que "estes funcionarios deben ser habilitados nacionais e as convocatorias non son suficientes para cubrir as vacantes en Galicia".


200 CONCELLOS EN SITUACIÓN CRÍTICA


A través dun comunicado emitido o luns, a Fegamp indicou que a situación se volveu "aínda máis crítica para 200 concellos galegos de menos de 5.001 habitantes" debido a que, ata o momento, "podían ocuparse eses postos con traballadores doutras categorías".


Con todo, coa entrada en vigor dun Real Decreto con data do 11 de setembro, os concellos están obrigados a que as prazas sexan cubertas con "habilitados nacionais", coa "única excepción" de que o municipio "conte xa cun funcionario do grupo A1" e, de forma voluntaria, esta persoa "se preste a desenvolver a tarefa".


Así mesmo, a Fegamp avisou que, ademais da falta de candidatos para as prazas, os concellos máis pequenos deberán realizar un "importante esforzo económico" para a cobertura destas vacantes, o que contradi "a Lei de Racionalización e Sustentabilidade e o principio de Estabilidade Orzamentaria".


APRAZAR A MEDIDA


Como solución, propuxo que se aprace a obrigatoriedade de contratar habilitados nacionais nos municipios de menos de 5.001 habitantes "ata que haxa convocatorias públicas suficientes ou se modifique a Lei de Bases".


Unha solicitude que se fai extensible para os de menos de 20.000 persoas "no caso de que, efectivamente, se reforme a Lei". Por último, a Fegamp avanzou que poñerá a problemática en coñecemento da Xunta, a Federación de Municipios Españois (Femp), o Ministerio de Facenda e as grupos parlamentarios galegos no Hórreo e Madrid.

relacionada ​Prorrogados os orzamentos galegos ata que se aproben os de 2017 en febreiro

Sen comentarios

Escribe o teu comentario




Non está permitido verter comentarios contrarios á lei. Nos reservamos o dereito a eliminar os comentarios que consideremos fora de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress