O Concello herculino urxe á Xunta a axilizar os trámites da intermodal

O Concello da Coruña requiriu á Xunta para que axilice "os trámites necesarios para definir e avanzar" na tramitación do proxecto da intermodal, que cualifica de "estratéxico" para a mobilidade da cidade.

Ademais, avanza que o alcalde, Xulio Ferreiro, e o concelleiro de Rexeneración Urbana, Xiao Varela, trasladarán, nunha reunión coa Consellería de Infraestruturas e Adif, "a necesidade de clarificar cuestións sobre a titularidade do chan da futura estación de autobuses".

Mentres, a Xunta asegura que o Concello herculino solicitou "modificacións de calado" e que está a analizar "as posibilidades de encaixar" as mesmas no contrato en vigor cunha empresa para a redacción do proxecto da estación autobuses intermodal. "Que se ve agora afectado en profundidade polos cambios formulados polo concello", apostila.

Por outra banda, sobre o transporte metropolitano e a mobilidade na cidade, indica que o acordo entre a conselleira de Infraestruturas, Ethel Vázquez, e o alcalde, Xulio Ferreiro, era "establecer un cronograma claro para a entrada dos buses metropolitanos ao centro como iniciativa para a mellora da mobilidade a curto prazo".

"Unha vez logrado isto, a Consellería atendería esa solicitude de reunión para abordar as melloras a medio prazo", sinala sobre a petición exposta a este respecto. Con todo, indica que o concello herculino "non cumpriu a súa parte e os buses seguen sen poder acceder ao centro".