O´Mega reivindica o acordo con Sanidade: "non é unha renuncia"

O sindicato O'Mega reivindicou o acordo alcanzado coa Consellería de Sanidade, "que non é unha renuncia", senón o "peche dunha fase concreta con compromisos asinados en materias autonómicas". Matizan así que as peticións ao Goberno por un Estatuto Marco continúan.

"A folga suspendida é exclusivamente a folga autonómica en Galicia, referida a materias nas que a Xunta e o Sergas teñen capacidade directa de negociación e cumprimento", remarcan.

Por tanto, aclaran, a reivindicación do Estatuto propio do facultativo continúa no ámbito estatal, dentro da folga nacional.

De feito, matizan que os titulares de prensa nos que se refire que se acordou a volta ás peonadas son "imprecisos". "O'Mega non acordou que os facultativos retomen a actividade voluntaria. Tampouco ten capacidade para decidir por ningún profesional nunha cuestión que é estritamente voluntaria e individual que o sindicato apoiou pero non promoveu", remarcan.