Ferreiro reprocha á Xunta "falta de compromiso" coa intermodal

O alcalde da Coruña, Xulio Ferreiro, reprochou á Xunta "falta de compromiso" co proxecto da estación intermodal desta cidade, en resposta ás críticas realizadas polo presidente da Xunta á Marea Atlántica sobre esta actuación.

A preguntas dos xornalistas, tras informar dos asuntos aprobados en Xunta de Goberno, Ferreiro sinalou que habería que preguntar á conselleira de Infraestruturas, Ethel Vázquez, "que pasa".

"Paréceme unha pouco tomadura de pelo que tenten escudar a súa falta de compromiso e incapacidade", sentenciou. Por outra banda, o rexedor coruñés indicou que a finais de agosto o Consistorio remitiu un informe á Consellería sobre o que dixo que non obtivo "resposta".

NON É IMPORTANTE PARA FEIJÓO

Ferreiro manifestou tamén que o Debate sobre o Estado da Autonomía evidenciou que A Coruña "non é importante" para a Xunta, en alusión ao discurso de Feijóo.

Aínda que asegurou que a súa axenda non lle permitiu seguir o debate, dixo que se evidenciou "a ineficacia absoluta do goberno da Xunta para resolver problemas básicos do noso país", o cal tampouco considerou "unha novidade".