Adif xustifica que as obras do AVE que van con atraso non lle afectarán á data final

Adif volveu saír ao paso das dúbidas expresadas por diferentes voces sobre a chegada do AVE a Galicia pola non aprobación dos Orzamentos Xerais do Estado. A empresa dependente de Fomento garantiu un investimento dun total de 4.029 millóns de euros para acabar as obras en 2019.

Nun comunicado, asegura que "o feito de que algunhas actuacións non estean adxudicadas non afecta á culminación da alta velocidade no prazo previsto". "O factor orzamentario tampouco é obstáculo para cumprir o prometido, xa que a planificación financeira de Adif permítelle conseguir fondos para o desenvolvemento dos seus proxectos a través de distintas fontes independentemente da aprobación os PGE", asevera.

Deste xeito, sinala que este orzamento de máis de 4.000 millóns inclúe tamén as obras da variante de Ourense, así como da estación intermodal na cidade das Burgas.

Así mesmo, subliña que no último trimestre de 2019 empezará a fase de probas dos trens de alta velocidade entre Pedralba (Zamora) e Ourense.