Adif asegura que ten marxe para endebedarse e rematar o AVE galego en prazo

Adif reiterou o compromiso do Ministerio de Fomento de finalizar as obras da liña de alta velocidade Madrid-Galicia e comezar a fase de probas, no tramo Pedralba-Ourense, a finais de 2019.

Fíxoo a través dun comunicado de prensa emitido despois de que a conselleira de Infraestruturas da Xunta expresase o seu temor a novos atrasos no AVE a Galicia se non se aproban os Orzamentos Xerais do Estado. Desde a oposición interpretáronse as palabras de Ethel Vázquez como escusas para preparar un novo atraso na conexión de AVE con Madrid.

"A planificación financeira de Adif AV permítelle conseguir fondos para o desenvolvemento dos seus proxectos a través de distintas fontes independentemente da aprobación dos Orzamentos Xerais do Estado, dispoñendo ademais dunha capacidade de endebedamento que lle concede unha marxe suficiente de independencia respecto dos PGE", asegura Adif.

Engade que a LAV Madrid-Galicia conta cun orzamento de 4.029 millóns de euros, "incluída a variante de Ourense, en fase de proxecto". "A vontade do Ministerio de Fomento, a través de Adif, é lograr que Galicia poida estar conectada por alta velocidade co resto de España no menor prazo posible", agrega.

Neste sentido, reivindica que o ministerio "conseguiu desbloquear en 2017 algúns dos tramos retardados por problemas técnicos". Desta maneira, indica que na actualidade se atopan finalizados ou en execución todos os tramos entre Zamora e Taboadela (Ourense) "co obxectivo final de cumprir cos prazos comprometidos".