O PSdeG reclama á Xunta datos sobre o seu apoio a familias en risco de desafiuzamento en 2025

Un total de 779 unidades familiares foron atendidas en 2025 polo programa galego de apoio a persoas en risco de desafiuzamento, delas 691 por falta de pagamento de aluguer e 88 por débedas hipotecarias. Así o sinala a Xunta en resposta a unha pregunta do PSdeG no Parlamento que recolle Europa Press. Este programa está cofinanciado polo Fondo Social Europeo Plus e desenvólvese no sete grandes cidades galegas. Nel prestan servizo 18 profesionais (traballadores sociais, técnicos xurídicos, técnicos financeiros e auxiliares administrativos", segundo a contestación da Xunta.

Os socialistas interrogaron ao Goberno galego noutra iniciativa por escrito tamén sobre a coordinación entre os servizos sociais autonómicos e os servizos sociais municipais nos casos de desafiuzamento. "Existen varias vías de coordinación" entre o programa galego de apoio a persoas en risco de desafiuzamento e os concellos, segundo sinala a Xunta.

Respecto diso, apunta ao caso no que o usuario chega "directamente" ao programa. Entón, "a oficina correspondente contacta de forma inmediata cos servizos sociais municipais do lugar de residencia da unidade familiar afectada para planificar actuacións e solicitarlles un informe social no que se dea conta da situación real en que se atopa".

Noutro suposto, "cando son os servizos sociais comunitarios os que directamente derivan o caso, compróbase si cumpre os requisitos para formar parte do programa, coordinando entre o concello e os técnicos do programa as actuacións a desenvolver, co fin de procurar recursos, emitir informes e facer seguimento do expediente".

Se o expediente chega a través dunha comunicación do xulgado, os servizos sociais comunitarios son informados e procédese "da mesma forma" que no segundo caso. Os técnicos do programa fan seguimento, asesoran á familia e trasladan ao xulgado a situación, de ser o caso, para que poida valorar a suspensión do lanzamento.

"Procuramos unha alternativa habitacional nos casos de lanzamento, asesoramos á persoa na tarefa de presentación de solicitudes e outros escritos, apoiamos á persoa demandada na súa petición de avogado pola quenda de oficio para asegurar o seu dereito á defensa se fose procedente, derivamos de ser o caso aos servizos especializados dependendo da problemática que presente o caso. Todo isto en coordinación e colaboración cos servizos sociais dos concellos", destaca a Xunta.

Noutra resposta, a Xunta expón que o programa, "froito da súa longa traxectoria", dispón de "toda unha serie de mecanismos de actuación" para coordinar o seu labor coa dos concellos ante un aviso de lanzamento.