A "emerxencia lingüística" mobiliza a milleiros de persoas en Santiago no Día das Letras Galegas

Milleiros de persoas procedentes de todos os recunchos do territorio manifestáronse este domingo en Santiago de Compostela, coincidindo co Día das Letras Galegas, en defensa do idioma e para esixir que se poña fin á situación de "emerxencia lingüística".

A manifestación, convocada pola plataforma Queremos Galego baixo o lema 'O galego, lingua vital', arrincou este mediodía desde a Alameda compostelá para percorrer as rúas compostelás para rematar na Praza da Quintana, onde ademais se programaron actuacións.

Ambiente reivindicativo e festivo
O galego encheu as rúas da cidade nunha xornada na que se mesturaron o ambiente reivindicativo do 17 de maio e o pouso das festas da Ascensión, que se celebran estes días en Santiago. 

Coa plataforma Queremos Galego liderando a marcha, os participantes avanzaron ao son de gaitas e pandeiretas. Durante o percorrido, os cidadáns clamaron consignas como:

"A Galiza, en galego"

"Nas aulas da Galiza queremos galego"

"Agora e sempre queremos galego"

Críticas á xestión da Xunta 
Antes do inicio da mobilización, o presidente da Mesa pola Normalización Lingüística e voceiro de Queremos Galego, Marcos Maceira, adiantou que a de hoxe sería unha manifestación multitudinaria na que a sociedade amosaría o seu compromiso coa lingua e a vontade de que se repoña en todos os ámbitos.

Maceira asegurou que as máis de 400 entidades sociais que elaboraron o protocolo 'Lingua Vital' chegan a este día "cos deberes feitos" grazas a esta alternativa cidadá, que conta con máis de 300 medidas destinadas a reverter a emerxencia lingüística. Do mesmo xeito, criticou a postura do Executivo galego:

"Temos un Goberno da Xunta que se mantén no anuncio permanente e o único que vemos son accións regresivas contra o galego", sinalou Maceira.

Ampla representación política e social
Na mobilización déronse cita cidadáns, activistas, persoeiros da cultura galega e representantes políticos, entre os que se atopaban a portavoz nacional do BNG, Ana Pontón, e o secretario xeral de Movemento Sumar Galicia, Paulo Carlos López.

Ana Pontón, líder da oposición no Parlamento de Galicia apostou "por unha lingua propia" nunha xornada na que a cidadanía expresa "que ama o galego" e reivindicou que o idioma "non é unha carga". A portavoz do BNG acusou directamente ao Partido Popular de manter unha estratexia de "acoso e derribo" contra o galego:

"Levamos 17 anos de derribo do PP contra a lingua que nos une", exclamou Pontón, quen tamén sinalou que o Goberno galego "quere enmascaralo baixo ese paraugas do plurilingüismo que é un timo" e reclamou, por iso, un "cambio de rumbo".