Marcha multitudinaria en Compostela por unhas pensións "dignas"

Cabeceira da protesta en San Caetano. Foto: @G_Caballero_M

Preto dun milleiro de persoas déronse cita este luns fronte ao edificio administrativo da Xunta, no compostelán barrio de San Caetano, para reclamar unhas pensións "dignas" tanto para o "presente" como para o "futuro".

A marcha, convocada por UGT e CCOO, continuará o martes desde Lugo e finalizará o día 9 en Madrid, onde se atoparán as distintas protestas territoriais.

Entre os asistentes, xunto aos líderes en Galicia de UGT e CCOO, José Antonio Gómez e Ramón Sarmiento, respectivamente, estaban membros de En Marea, como Eva Solla, e do PSdeG, cun bo número de deputados encabezados polo seu portavoz, Xoaquín Fernández Leiceaga.

Ataviados con camisetas, gorras e bandeirolas dos dous sindicatos, algúns dos manifestantes portaban pancartas con lemas como 'Feijóo, o teu aforro é o sufrimento de moitos'.

"GARANTIR" AS PENSIÓNS

"Hai que reclamar medidas urxentes para recuperar e revitalizar o sistema de financiamento das pensións públicas", defendeu Ramón Sarmiento, en declaracións aos medios, consciente de que a configuración dos próximos orzamentos é un momento "clave".

Trátase, segundo as súas palabras, de "garantir" as pensións "de hoxe" e de dar "garantías" aos mozos de que terán "unha pensión digna" cando lles toque poñer fin á súa carreira profesional.

Pola súa banda, o responsable de UGT en Galicia apelou á "loita" contra o "empobrecemento" das pensións que supuxo --criticou-- a reforma "unilateral" do sistema que aprobou o PP en solitario en 2013.

"Reclamamos ao Goberno a volta ao Pacto de Toledo", incidiu, para censurar que o IPC suba "un 1,6 por cento" mentres a contía das pensións só mellora "un 0,25 por cento".

Tras recalcar que "loxicamente, isto non pode ser", o sindicalista de UGT lembrou que só Estremadura ten pensións máis baixas que as de Galicia e que o 40 por cento dos nosos pensionistas está "ao bordo da exclusión social".

"É UN SISTEMA SUSTENTABLE"

A continuación, Leiceaga chamou a "garantir" que o sistema de pensións é "sustentable" e permite que a xente teña "unha vida digna" ao acabar a súa vida laboral. Para iso, reclamou subir as pagas máis baixas e asegurar "a estabilidade e a viabilidade" do sistema.

Así mesmo, Gonzalo Caballero, un dos aspirantes para liderar o PSdeG, apoiou esta protesta. "Queremos unha pensión digna para os nosos maiores e un sistema público máis xusto e que dea maior calidade de vida á cidadanía", salientou.

SOLIDARIEDADE CON CATALUÑA

Á marxe destas cuestións, o responsable de CCOO en Galicia fixo mención ao ocorrido o domingo en Cataluña para mostrar a súa "solidariedade" con quen padeceu "a violencia e o absurdo comportamento" do goberno liderado por Mariano Rajoy.