Un ex-político coruñés do PSOE, Vázquez Blanco, investigado en operación anticorrupción en Portugal

Emilio Vázquez Blanco, que foi secretario de Organización do PSOE na Coruña e deputado autonómico no Parlamento de Galicia até 2016, foi chamado a declarar como investigado na Operación Imergente. Así o desvelou o medio luso Observador e confirmaron a Galiciapress fontes próximas ao empresario. 

A Policía Xudicial portuguesa acúsao, segundo as citadas fontes,  de actuar como cómplice necesario de Duarte Moral, asesor de prensa do secretario xeral do PS, José Luís Carneiro, nunha presunta  trama de prevaricación, malversación e manipulación de licitacións públicas que desviaría até dous millóns de euros do erario.

Un galego en Lisboa

Licenciado en Ciencias Políticas e máster en Mercadotecnia Política, fundou en Lisboa a consultora BMD Comunication, Unipessoal hai nove anos. Anteriormente, até 2024, esta empresa chamábase Cecubometrics, Unipessoal.  Vázquez Blanco mantén actividade mercantil no campo da comunicación na Coruña.

A compañía lusa está rexistrada como "consultoría empresarial e de xestión, estudos non xurídicos e asesoramento a empresas, organismos e institucións públicas e privadas en materia cultural, social, educativa e económica".  

Esta consultora, segundo os medios lusos, traballou repetidamente do PS. Segundo o informe da Entidade das Contas e Financiamento Político de Portugal (ECFP),  facturou 98.400 na campaña das europeas de 2019 mediante catro facturas deficientes, pois "non detalla as tarifas, número de membros do equipo, horas e tarifa unitaria/hora correspondente".  A Entidade dás Contas e Financiamentos Políticos sería o equivalente ao Tribunal de Contas en España. 

En total, o PS transferiu á empresa do galego 351.000 euros en tres procesos electorais, di o Observador. Os investigadores sospeitan puido haber contratos inflados nalgúns concellos que gobernaba o PS .

400 axentes e o rexistro histórico da sede do PS

A operación na que se enmarca a detención de Vázquez Blanco representa un fito na historia democrática de Portugal. Máis de 400 axentes da Unidade Nacional de Combate á Corrupción executaron preto dun centenar de rexistros —60 en domicilios e 32 noutras dependencias— na área metropolitana de Lisboa. Por primeira vez desde a Revolución dos Caraveis, as forzas da orde accederon á sede nacional do Partido Socialista para buscar probas no despacho de Duarte Moral.

Os outros catro investigados son a propia Moreira; a súa esposa Rute Reimão; o histórico dirixente municipal socialista Miguel Coelho, acusado de tecer unha rede clientelar de contratos a dedo que beneficiou a decenas de militantes e empresas afíns; Rui Pedro Nascimento, ex presidente do PS de Oeiras; e Filipa Laborinho, antiga concelleira tamén dese municipio, detida por posesión de arma prohibida e posta en liberdade durante a tarde.

Ante a magnitude do escándalo, o secretario xeral do PS, José Luís Carneiro, compareceu para subliñar que o partido «non é obxecto de investigación» e que colabora lealmente coa xustiza.