Voos entre Santiago e Ámsterdam a partir do 30 maio de 2026
A aerolínea KLM anuncia unha nova ruta con dúas frecuencias semanais até xullo e, de xullo a agosto, con frecuencias diarias.
A aerolínea holandesa KLM anunciou que comezará a operar nunha ruta que conectará Santiago de Compostela con Ámsterdam a partir do 30 de maio de 2026.
Tal e como trasladou a propia aerolínea na súa páxina web, operará entre o 30 de maio e o 3 de xullo os sábados e domingos; a partir do 4 até o 30 de agosto haberá voos diarios; e desde o 31 de agosto até o 24 de outubro retomaranse os voos os sábados e domingos.
A saída de Ámsterdam será ás 13.45 horas, con chegada a Santiago de Compostela ás 16.10 hora local, mentres que a saída de Santiago será ás 16.40 horas, con chegada a Ámsterdam ás 19.05 horas. A aeronave encargada de transportar aos pasaxeiros será a Embraer 190 ou a Embraer 175.
Segundo destacou KLM Santiago é a "porta histórica" á rexión de Galicia e destaca pola súa "rica cultura, a súa requintada gastronomía e o seu papel como punto final do mundialmente famoso" Camiño de Santiago.
Desta maneira, Santiago incorpórase aos novos destinos europeos de verán da aerolínea, xunto a illa británica de Xersei e Oviedo.
Escribe o teu comentario