Caamaño defende que o debate sobre o gasto en Primaria é "artificial" pese ao tirón de orellas de Contas

O conselleiro de Sanidade, Antonio Gómez Caamaño, asegurou este martes que o seu departamento asume habitualmente con "deportividade" as conclusións do Consello de Contas, aínda que ao mesmo tempo cuestionou o fondo do último informe publicado polo organismo fiscalizador. Ao seu xuízo, a polémica sobre a porcentaxe de investimento destinado a Atención Primaria constitúe un debate "un pouco artificial" que non reflicte fielmente a realidade do sistema sanitario galego.

O conselleiro sostivo que si se incluíse no cómputo de Primaria o gasto en fármacos recetados por médicos de familia, a porcentaxe superaría o 30%, moi por encima do 12% que cifra o Consello de Contas e afastado tamén do 25% que recomenda a Organización Mundial da Saúde. Engadiu que o investimento sanitario total en Galicia crece cada ano e que o gasto en Atención Primaria duplicouse respecto ao exercicio anterior.

O informe do ente fiscalizador, con todo, é categórico: o Sergas destina a Primaria unha porcentaxe inferior non só ao limiar da OMS, senón tamén á media estatal do 14%, e Galicia só é superada á baixa pola Comunidade de Madrid. Ademais, 120 concellos galegos carecían de servizo pediátrico nos seus centros de saúde e outros 96 compartían pediatra, segundo datos de outubro de 2025. 

RUEDA, NO PUNTO DE MIRA

Caamaño seguiu a mesma liña argumental que o presidente Alfonso Rueda o día anterior, insistindo en que os datos do informe corresponden ao exercicio 2023, e que desde entón a consellería traballou para mellorar a situación. Foi precisamente ese argumento o que acendeu a mecha no Parlamento galego, onde a oposición compareceu tras a Xunta de Portavoces cunha resposta común.

A viceportavoz do #PSdeG, Lara Méndez, lembrou que Rueda leva 17 anos formando parte do Goberno autonómico, polo que desvincular dos datos de 2023 resulta, ao seu xuízo, unha falta de respecto á cidadanía. O Grupo Socialista ha rexistrado ademais unha interpelación para reclamar á Xunta que reforme o modelo de Primaria con máis contratacións, mellores condicións laborais e unha conexión efectiva coa saúde mental.

Pola súa banda, a viceportavoz do #BNG, Olalla Rodil, coincidiu en sinalar a contradición dun presidente que pretende desvincular dun goberno do que forma parte desde 2009. Rodil anunciou que a portavoz nacional do BNG, Ana Pontón, levará as advertencias de Contas á próxima sesión de control no Parlamento. O informe chega no medio de protestas sostidas pola situación da sanidade pública, nunha xornada de folga convocada pola CIG, e co debate aberto polo plan para limitar as baixas laborais. 

A REALIDADE SOBRE O TERREO

O 28% das prazas de Primaria están vacantes e as demoras para ver ao médico de familia incrementáronse, con pacientes que esperan máis de cinco días no 39% dos casos na área de Pontevedra e no 30% na de Ferrol.