A Xunta fixa os servizos mínimos para a folga de profes de martes, abrindo os coles aínda que non haxa clase

A folga docente convocada para este martes 28 de abril no ensino público galega non pechará os colexios. A Xunta publicou onte no Diario Oficial de Galicia (#DOG) a orde pola que establece os servizos mínimos para o paro impulsado por CIG-Ensino e STEG, aos que se sumou o Sindicato de Estudantes, ampliando así o conflito máis aló do claustro e alcanzando ao conxunto da comunidade educativa.

Segundo a orde, os servizos esenciais afectan o persoal docente de todos os centros dependentes da Consellería de Educación, Ciencia, Universidades e Formación Profesional durante as 24 horas do día de folga. O seu obxectivo principal é compatibilizar o exercicio do dereito á folga coa protección integral do alumnado menor de idade, garantindo as funcións de vixilancia que forman parte do dereito á educación.

Para iso, a Xunta obriga a que o director ou un membro do equipo directivo estea presente en cada centro durante o horario habitual. Nos colexios con menos de seis unidades, esa responsabilidade poderá recaer nun docente do claustro. A designación concreta de quen cubrirá ese servizo corresponde a cada dirección, que deberá facela pública no taboleiro de anuncios do centro. O incumprimento desta obrigación levará sancións conforme á normativa vixente.

CONFLITO QUE DURA TODO O CURSO

Esta convocatoria é a sexta folga do curso 2025-2026 no ensino público galega. CIG-Ensino e STEG, xunto ás Asembleas Abertas do Ensino Público, veñen protagonizando mobilizacións desde o 25 de setembro, con paros de 48 horas en outubro e decembro e peches de profesores en centros de toda a comunidade. As reivindicacións céntranse na redución de cocientes, mellora da atención á diversidade, recuperación de dereitos laborais e máis especialistas para alumnado con necesidades específicas. Tamén na Educación Infantil viven un curso cheo de protestas e mobilizacións. 

Os sindicatos acusan ao conselleiro Román Rodríguez de negar a negociar coa maioría representativa e de optar por acordos con sindicatos minoritarios. De feito, hai apenas días a Consellería asinou un pacto con CC.OO., UXT, ANPE e CSIF —sen CIG nin STEG— que inclúe a recuperación das 18 horas lectivas en Secundaria a partir do próximo curso, un acordo que os sindicatos convocantes consideran insuficiente e que xa ten precedentes incumpridos desde 2023.

MANIFESTACIÓN EN SANTIAGO

Rodríguez, pola súa banda, cualificou en anteriores ocasións a conflitividade como unha estratexia deliberada de organizacións nacionalistas de esquerda. A Consellería non se pronunciou publicamente sobre os servizos mínimos máis aló da orde publicada no DOG. Para este martes está prevista ademais unha manifestación en Santiago de Compostela que partirá ás 12:00 horas desde a Alameda. Os convocantes advirten de que, se a Xunta segue sen mover, preparan novas xornadas descentralizadas por toda Galicia a comezos de maio.