Juanfran: "Pepe Mel é o mesmo que nos sacou dun momento fodido"

Juanfran, contra o Espanyol. Foto: RC Deportivo

Un dos capitáns do Dépor, peso pesado no vestiario e un fixo para Pepe Mel, Juanfran Moreno compareceu este luns ante os medios de comunicación para mostrar o apoio dos xogadores ao técnico.

"Estamos a morte con el", proclamou o lateral. "Un adestrador coa súa experiencia vénnos ben porque xa estivo en situacións complicadas. É o mesmo que nos sacou dun momento fodido", argumentou.

Juanfran contou que esta mañá Pepe Mel lles deu unha charla "e ten máis razón que un santo". Na análise saíron as dúas carencias do equipo, "un problema mental e tamén de fútbol".

O primeiro deles pode solucionarse gañando o sábado en Riazor contra o Xetafe. "Se gañamos ao Xetafe todo cambia e será un bo xute de enerxía forte", razoou o lateral.

Para o problema futbolístico, a receita de Juanfran pasa por manter a portería a cero. Conscientes de que "o equipo ten gol, marca sempre", hai que poñer solución aos tantos recibidos, que sitúan o Dépor, con 15, como o conxunto máis goleado.

Iso si, advirte de que non é só culpa da defensa. "O balón chega ao dianteiro fácil porque vén de atrás. É unha cousa de todos, todos temos que ser máis fortes e agresivos", reprochou.