Gadis convoca o seu III Concurso de Microrrelatos tras o éxito das edicións anteriores

Na súa III Edición, o certame da firma galega espera repetir a experiencia de anos anteriores, con miles de participantes no concurso.

Un iPad, un telescopio e un lector de libros electrónico son os galardóns para os tres primeiros clasificados desta aposta pola cultura. 

Os soños, o universo onírico da subconsciencia, ou aquilo que facemos cos ollos abertos e pensamos naquilo que temos ao noso alcance ou que anhelamos, serán o tema central do próximo Concurso de Microrrelatos da cadea de supermercados Gadis, que encara a súa III Edición.

“Soñar é anhelar, durmir, imaxinar. Poñerse metas e querer conseguilas. Que son para ti? Que soños tes para o futuro?”, expón Gadis na convocatoria. Os requisitos son sinxelos: as historias non poden superar as cen palabras, pero tampouco baixar das tres. Nesa pinza, ábrese un mundo de opcións para os participantes, que deben ser maiores de 14 anos para poder concursar. 

"DESCUBRIR TALENTO"

Gadis persegue así "descubrir talentos emerxentes que, por diante, teñen case dous meses para perfilar a narración xa que o prazo para presentar os microrrelatos finaliza o próximo 31 de agosto". Para iso hai que seguir as indicacións da web.  

Os tres primeiros clasificados recibirán un iPad, un telescopio e un lector de libros electrónico, nesa orde do ouro ao bronce. Ademais, cos microrrelatos finalistas, igual que en anos anteriores, Gadis pretende reunilos nun libro e editar 12.000 exemplares que regalará nos puntos de venda de Galicia e Castela e León. Ademais, poderase descargar na web en formato dixital.