Tino Fernández insiste en chamar á calma polo rumbo do equipo
Rexeita falar de ultimato a Pepe Mel, aínda que ten en mente "algún tipo de cambio" se se alonga este rumbo.
Tino Fernández agarda polo menos catro puntos esta semana.
O Dépor non quere trasladar unha mensaxe de inquietude á afección, a pesar da mala imaxe e os resultados. Este martes, Tino Fernández pediu calma antes do partido ante o Alavés, que este mércores chega a Riazor.
"O importante é non deixarse levar por estados de ánimo extremos e si ter un proxecto claro", manifestou, para insistir en que "a principal preocupación neste momento debe ser animar o equipo, animar o corpo técnico e poñer como afeccionados todo o mellor para que o proxecto vaia cara adiante".
O presidente deportivista confía "no potencial dos xogadores e do corpo técnico" e confía en "ser capaces de sacar partidos adiante sen problema". Por iso, rexeita falar de que que esta semana poida ser a última de Pepe Mel, se non empeza a sumar puntos.
"Se se alonga unha traxectoria na que non arrincamos, xa se verá se hai algún tipo de cambio", anunciou.
Aínda que deixou caer que espera polo menos catro puntos esta semana, fronte a Alavés e Espanyol. "Estou seguro de que o mércores imos gañar e que en Barcelona imos puntuar ou imos gañar", expresou.
Tamén se referiu á súa propia posición no Dépor, recoñecendo que non se vería capaz de volver afrontar unha situación como a que se atopou á súa chegada á presidencia. "Eu paseimo ben na Universidade, pero volvería facer outra carreira? Pois non. E aquí pásame o mesmo. Se me din que queda outro tanto por pasar como o que pasaches, no verán voume", proclamou.
Escribe o teu comentario