O BNG lembra a Marcela e Elisa, as precursoras galegas do matrimonio homosexual

O BNG pedirá no Parlamento de Galicia instaurar o 8 de xuño como "o Día da visibilidade lésbica" en recordo de Marcela e Elisa, as primeiras e únicas mulleres lesbianas que chegaron a casar pola Igrexa en España. A voda tivo lugar o 8 de xuño de 1901 na parroquia coruñesa de San Xurxo.

Diso informou este xoves a deputada do Bloque Olaia Rodil, que participou nun acto na Praza 8 de Marzo de Santiago de Compostela xunto a membros da organización xuvenil Galiza Nova para presentar esta iniciativa.

Segundo destacou Rodil, este xoves cúmprense "116 anos" da voda destas dúas mestras, a primeira "lésbica" rexistrada en Galicia e España. "Elas conseguiron casar facendo pasar a Elisa por Mario, un emigrante inglés supostamente protestante".

Con todo, conforme lembrou, tras a celebración do matrimonio, ambas tería que fuxir ao exilio a Portugal tras ser descubertas polos seus veciños e, despois de pasar polo cárcere, a Buenos Aires, onde se lles perdería a pista.

Para o Bloque, esta efeméride do 8 de xuño serviría par "lembrar a Marcela e Elisa" pero tamén para dar visibilidade "ao colectivo LGTBI en xeral e, en concreto, ás mulleres LGTBI galegas".

E é que conforme explicou unha das integrantes de Galiza Nova, Navia Rivas, as mulleres LGTBI sofren "unha dobre opresión", unha polo feito de seren mulleres nunha "sociedade patriarcal" e outra por pertenceren ao colectivo LGTBI.

Esta medida, para Olaia Rodil, serviría para "restituír a memoria de dúas mulleres que foron perseguidas simplemente por amarse" e visibilizar que en Galicia as mulleres "levan moitos anos queréndose en liberdade".

CAMPAÑAS DE SENSIBILIZACIÓN

Ademais, conforme destacou Olaia Rodil, os nacionalistas galegos tamén pedirán o a Cámara que a Xunta inicie unha campaña de sensibilización e educación social en materia de identidade sexual e identidade de xénero.

"É algo que aparece recollido na Lei de 2014 para a non discriminación do colectivo LGTBI e queremos que sexan os centros Quérote + os que desenvolvan esta campaña", manifestou.

E é que, segundo criticou a parlamentaria nacionalista, desde a aprobación deste texto legal "o máximo que fixo" o Goberno galego foi "repartir uns carteis de 'Eu respecto' nos centros educativos", sinalou.

"Non nos parece serio, os colectivos LGTBI levan anos reclamando que o que se ten que facer é poñer medios económicos para educar na diversidade, respecto e tolerancia", indicou.