Venezuela: nave en rumbo de colisión

Pasaron uns cantos días desde que o Presidente Maduro tomou a iniciativa de convocar unha Asemblea Nacional Constituínte. Os pronunciamientos en contra son numerosos, eu diría maioritarios, e inclúen, obviamente, a oposición pero tamén aos sectores Chavistas disidentes do madurismo, a algúns chavistas confesos, a algúns movementos dentro do propio partido de goberno e ata aliados próximos como o Partido Comunista de Venezuela, para quen… "a ANC debe ser a expresión máis ampla, máis diversa da sociedade venezolana con participación na elaboración do programa da nova Constitución, con representación proporcional das forzas políticas e sociais que fan vida no país…" e convidan "a un debate nacional das bases comiciais". 

Mentres tanto, desde o goberno, óense voces convidando á súa militancia a "prepararse para a guerra", a través da activación e ampliación das "milicias do pobo" e novas compras de equipos militares a Rusia.

Ao mesmo tempo, o Consello Nacional Electoral (CNE), máximo órgano electoral e o Tribunal Supremo de Xustiza (TSJ), reitor da legalidade da Nación, mantéñense cos brazos cruzados fitando o teito, nun silencio cómplice fronte ás accións que adianta o goberno respecto da designación dos Deputados Constituíntes. Parece que para eles, aquí non está a pasar nada!

As tímidas declaracións da Fiscal Xeral da Nación acerca da eventual "creba da legalidade", parecen tan insignificantes que a única represalia do goberno, segundo dixo ela mesma, foi o retiro do seu escolta persoal.

Así as cousas, o que se percibe é o retroceso do "estado de conflito" existente, o cal podería enfrontarse a través do diálogo e a negociación, a unha condición de franca "confrontación antagónica" entre o goberno e o resto do país, o cal significa a absoluta negación "do outro" e o inicio do proceso de aniquilación, é dicir: a guerra.

Non debería estrañarnos, entón, que de súpeto apareza o Presidente Maduro "bailando salsa" e participándonos que temos nova Constitución.

Neste contexto, Venezuela preséntasenos hoxe como unha nave en curso de colisión! 

Artigo publicado orixinalmente en CatalunyaPress