A Xunta declara o período de alto risco de incendios "co persoal de reforzo na casa"

As previsións meteorolóxicas para os próximos días, con temperaturas altas, refachos de vento e ausencia de choiva, levaron á Consellería do Medio Rural a decidir activar a situación de alto risco este mesmo xoves 13 de abril, segundo informa a CIG nun comunicado. Con todo, dita alerta non irá acompañada, "como vén sendo costume" da posta en servizo do persoal propio da Administración destinado para o período de alto risco, denuncia o sindicato autonómico. 

Desde a CIG reprochan á Xunta que os traballadores e traballadoras de reforzo para as tempadas de alto risco, pertencentes ao persoal propio do Servizo de Prevención e Defensa contra Incendios Forestais (SPDCIF) da Consellería do Medio Rural, "sigan sen ser contratados unha vez a propia Xunta declara a situación de perigo de incendio forestal".

Ademais, reiteran a súa petición de que o persoal de reforzo, que traballa tres meses ao ano durante o período de máis risco de incendio, pase a ser contratado por un período mínimo de nove meses "como recolle o convenio colectivo", "a maiores desde que a propia lei de protección civil inclúe o SPDCIF dentro dos dispositivos de emerxencias facendo que desapareza a estacionalidade do risco". 

"Atallaríase así en boa medida este despropósito da improvisación continua na xestión da prevención e da defensa contra os incendios forestais aos que por desgraza nos ten afeitos a Consellería de Medio Rural", inciden.  

Precisamente a meteoroloxía levou á Xunta a decretar a suspensión cautelar "ata novo aviso" de queimas agrícolas e forestais este mesmo luns, debido ao risco de que se produzan incendios forestais despois de analizar os diferentes indicadores técnicos que inciden no risco do lume. 

Só durante a xornada do domingo, Medio Rural daba aviso de senllos incendios en Carballeda de Avia (20 ha), Vilariño de Conso (34 ha), Cualedro (25 ha) ou Lobios (150 ha).