Mercadona súmase nos seus centros de Galicia á campaña a Gran Recollida de Alimentos

Mercadona participa con 62 tendas situadas en Galicia na Gran Recollida de Alimentos, organizada pola Federación Española de Bancos de Alimentos (Fesbal), que arrinca este venres, 7 de novembro, e prolongarase até o 16 de novembro.
 

Como cada ano, a compañía pon a disposición da campaña os seus puntos de venda para a recadación de fondos, co obxectivo de dar aos seus clientes a posibilidade de participar neste evento solidario anual a favor dos Bancos de Alimentos.
 

En total participarán 1.589 tendas de Mercadona en toda España, das cales 62 corresponden a Galicia.

Como en edicións anteriores, a colaboración da compañía na Gran Recollida realizarase mediante a modalidade de doazón monetaria, múltiplo de 1 euro, que os clientes poderán realizar no momento da compra ao pasar por caixa.

A doazón monetaria en caixa, explica a empresa, permite aos Bancos de Alimentos comprar os alimentos que realmente necesitan, nas cantidades que precisan e no momento axeitado, xa que dispoñen de todo un ano para trocar as achegas.
 

Mercadona explica que avoga pola modalidade de doazón monetaria porque, ademais, é máis sostible, xa que reduce o transporte, a clasificación e a almacenaxe innecesaria.
 

Así mesmo, ofrece vantaxes fiscais, xa que as doazóns quedan reflectidas no ticket de compra e poden desgravarse na declaración da renda (máis información en granrecogida.org). Por parte de Mercadona, e como en anos anteriores, achegarase o 10% da recadación total a esta iniciativa solidaria.