O reto de Liliput

Seguro que lembras a novela 'As viaxes de Gulliver', de Jonathan Swift, ou por lela ou por algunha versión en película ou debuxos animados baseados nela. Nesta novela Gulliver viaxaba, entre outros sitios, a Liliput, unha illa na que as dimensións espaciais das persoas, plantas, obxectos e animais son 12 veces máis pequenas que as que el coñecía e comparaba consigo mesmo. 

Só Gulliver conservaba as súas dimensións normais… ou a esa conclusión chegou el! Desde logo é para preguntarse que se TODO era máis pequeno do normal, non sería o propio Gulliver o que tiña o problema? En calquera caso ese é un dos escenarios no que se desenvolven múltiples aventuras na novela de Swift. 

Tomando esta historia como referencia, hai algún tempo expúxenlles aos meus alumnos de física de primeiro curso de grao universitario a seguinte pregunta: se espertas pola mañá e alguén che di que TODO encolleu nun factor 12, incluíndote a ti mesmo, a túa roupa, a túa casa e calquera outra cousa que vexas, como verificas que é certo ou demostras que é falso? Pode parecer unha pregunta sinxela pero as respostas foron en grao sumo interesantes. 

Esta mesma pregunta gustaríame exporlla ao lector destas liñas. Trátase dunha pregunta que non ten solución única e non expoño ningunha restrición para respondela máis aló de que as dimensións espaciais de calquera obxecto material, vivo ou inerte, se encolleron nun factor 12 conservando a súa masa. Se o lector quere traballar baixo algunha hipótese compatible con esta restrición, a súa resposta será benvida… aínda que xorden respostas interesantes con recursos tan simples como unha regra (que por suposto tamén está encollida, unha balanza e un reloxo, sen coñecementos de física ou matemáticas máis aló dos que poida ter un estudante de secundaria. Atréveste?