A firma de hipotecas repunta case un 21% en Galicia

O número de hipotecas constituídas sobre vivendas inscritas nos rexistros da propiedade situouse en 977 en novembro en Galicia, cifra superior nun 20,8% á do mesmo mes de 2015, de acordo cos datos que publica este venres o Instituto Nacional de Estatística (INE).

Mentres, en variación mensual, as hipotecas rubricadas en novembro supuxeron un incremento do 39,2% respecto das que se asinaron en outubro, o maior incremento entre as comunidades españolas e moi por encima da media nacional, do 12,5%.

En canto ao capital prestado, ascendeu a case 96 millóns de euros, un 25,4% máis en variación interanual e un 32,5% máis que no mes anterior.

EN TOTAL, 1.565 HIPOTECAS

En total, os galegos subscribiron no penúltimo mes do ano pasado 1.565 hipotecas, por un valor duns 126,26 millóns de euros, repartidos entre parcelas urbanas (120,82 millóns e 1.519 das operacións) e parcelas rústicas (5,4 millóns con 46 hipotecas).

Respecto das urbanas, repartíronse entre hipotecas sobre vivendas (as mencionadas 977, por 95,55 millóns), sobre solares (9, por 1,62 millóns) e noutras urbanas (533, por 23,65 millóns).

DATOS ESTATAIS

A nivel nacional, o número de hipotecas constituídas sobre vivendas inscritas nos rexistros da propiedade situouse en 25.413 o pasado mes de novembro, cifra un 32,2% superior á do mesmo mes de 2015.

Con esta subida interanual en novembro pasado, a firma de hipotecas encadea catro meses de ascensos consecutivos tras repuntar un 6,4% en agosto, un 10% en setembro e un 16,8% en outubro.