Kakuta chega cedido ao Dépor para "ser mellor que no Rayo"

Gaël Kakuta (21 de xuño de 1991, Lille - Francia) superou esta mañá o recoñecemento médico no Hospital HM Modelo da Coruña e, a continuación, asinou o seu contrato que o vincula ao Deportivo, en calidade de cedido, ata o próximo 30 de xuño.

Nas súas primeiras declaracións aos medios de comunicación, no propio hospital HM Modelo, Kakuta manifestou estar "moi feliz de volver a España. Grazas ao Deportivo pola confianza".

Asegura gustarlle "moito" a liga, "tiven a oportunidade de volver. E estou moi feliz de estar aquí" e "vou ser mellor que no Rayo. Vou dar a miña mellor versión e traballar moi duro para aproveitar a oportunidade".

A nivel físico, o atacante francés explicou que "levo un mes traballando co preparador físico. Estou ben fisicamente. Traballei un pouco en China co equipo. Estou ben". Iso si, pediu "un pouco de tempo" de adaptación, "porque veño dun país seis horas máis que aquí".

En calquera caso, prometeu "prepararme ben para xogar pronto", decisión que deixa en mans de Gaizka Garitano. Opina do Deportivo que "é un equipo que xoga un fútbol que me gusta, que xoga ben o balón. Coñezo os xogadores porque se ve a liga en televisión".

DEU UN GRAN NIVEL NO RAYO

O exercicio 2014-2015 supuxo un punto de inflexión para Kakuta, cedido ao Rayo Vallecano, onde rendeu a un gran nivel (35 partidos, 5 goles), o que lle valeu un traspaso ao Sevilla, que pagou ao Chelsea uns 3,5 millóns de euros polos seus servizos. Con todo, no Pizjuán non callou (5 partidos, 1 gol) e foi vendido no mercado de inverno ao Hebei China Fortune por 5 millóns de euros. No país asiático, xogou 24 encontros e anotou 1 gol, nunha tempada na que o seu equipo finalizou na sétima praza.