A José Antonio Urruticoechea Bengoechea, máis coñecido polo alcume de Josu Ternera o acaban de deter en Sallanches a Policía francesa e a Garda Civil española, cando xa todo o mundo informativo o daba como "desaparecido táctico" ao estar politicamente amortizado por completo tras o adeus ás armas de ETA.

Josu Tenreira

Sabíase nos medios de comunicación que o número 1 da banda terrorista fuxira cando tiña inmunidade parlamentaria en Euskadi, que padecía, por aquel entón, de cancro e que estaba no allo das negociacións secretas, onde os xornalistas recoñeciámolo, mesmo, como a pedra angular que podía torcer a man dos etarras máis sanguinarios que pelexaban porque a banda criminal non desaparecese. A súa voz no comunicado final de ETA confirmaríanos a posteriori ese papel de Xefe Supremo que todos lle atribuiamos.

Ninguén esperaba agora, agás as familias das súas vítimas, que Ternera fose detido nestes momentos, tan preto do duelo pola morte do seu mortal inimigo Alfredo Pérez Rubalcaba, o seu opoñente/interlocutor alén da mesa de conversacións.

Por iso esta detención chama a atención, por moito que as forzas de seguridade do Estado nos digan que sempre se mantiveron alerta, como é a súa obrigación, e que se pillou agora, que é cando se puido facer. Moitos somos escépticos ante ese mantra, porque sospeitamos que a historia do personaxe ten moitos capítulos que descoñecemos que, seguramente, farán posible que pronto saibamos algo máis sobre os misterios que encerra a súa fuxida e por suposto o que, como, cando, onde e por que ETA deixou de matar.

Se a iso lle sumamos o historial dos crimes sen autor coñecido que, seguramente, Ternera poderíanos desvelar se quixese, hai índice suficiente para que entre todos, especialmente os xornalistas, podamos dar un salto cualitativo para coñecer a verdadeira historia do últimos sesenta anos, sesenta nada menos, das actividades da organización que dirixiu este Josu Ternera que acaban de deter ás sete da mañá cando ía en compañía do seu habitual coidador e gardacostas dos últimos anos ao hospital onde recibía tratamento.

Volve Ternera e nós temos moitas preguntas que facerlle ao número 1 de ETA, pero tamén, por suposto, ás tan nomeadas nas últimas semanas, cloacas do Estado.