A Audiencia Provincial arquiva a denuncia de Pomba Lago contra Alfonso Villares por agresión sexual

A causa iniciouse tras a denuncia presentada pola presentadora de televisión Pomba Lago, quen situaba os feitos na súa casa de Ferrol, o 27 de decembro de 2024, afirmando que espertou completamente desorientada e espida na súa vivenda, asegurando ser vítima dunha submisión química, unha modalidade de delito que implica o uso de sustancias para anular a vontade da vítima.  

A Audiencia Provincial da Coruña acaba de confirmar o arquivo desa denuncia por agresión sexual contra o exconselleiro do Mar Alfonso Villares, ratificando o auto ditado en decembro pasado polo Xulgado de Instrución número 2 de Ferrol. O tribunal considera que non existen indicios suficientes para procesar ao exdirigente do Partido Popular.

A resolución da sección primeira da Audiencia Provincial subliña que a investigación desenvolvida pola xuíza instrutora foi "ampla e minuciosa" e que, sobre esa base, a maxistrada non apreciou elementos de cargo bastantes para avanzar cara a un procesamiento. O Ministerio Fiscal tamén compartiu ese criterio. Segundo o auto, "practicáronse todas as dilixencias pertinentes para o esclarecemento dos feitos investigados", polo que os maxistrados entenden que o procedente é confirmar o peche do sumario.

A acusación particular había solicitado que a causa regresase ao xulgado de instrución para que se tomase declaración a dúas persoas: a condutora e a asistente da ambulancia que atendeu á denunciante aquela noite. A sala rexeita esa petición por considerar que ambas as dilixencias teñen un "carácter claramente periférico e prospectivo" respecto ao núcleo dos feitos investigados.

A PROBA DA SUBMISIÓN QUÍMICA

O tribunal vai máis aló e desmonta o argumento da acusación. Segundo os maxistrados, pretender que as dúas traballadoras da ambulancia puidesen actuar como testemuñas directas para determinar si a denunciante presentaba síntomas compatibles con submisión química "carece de solidez lóxica e procesual". E engaden un argumento de peso: esa hipótese xa foi descartada por declaracións de médicos especialistas e polo resultado de análise e probas clínicas practicadas. O informe toxicolóxico realizado no hospital horas despois resultou negativo: non se acharon rastros de drogas, alcol ou calquera outra sustancia no organismo da denunciante. 

Así, a Audiencia conclúe que reclamar agora esas declaracións como vía para soster un procesamiento "non pasa de ser unha conxectura carente de base obxectiva". No entanto, contra este auto cabe a presentación de recurso de súplica, polo que a porta xudicial non queda completamente pecha para a acusación particular.

A resolución tamén aclara que o debate non radica en si a investigación foi insuficiente, senón en que a acusación pretende obter "unha nova valoración incriminatoria" do xa actuado para alcanzar un resultado procesual que nin a instrutora nin a fiscalía consideraron procedente.

O LONGO CAMIÑO DESDE A DIMISIÓN

O caso sacudiu a política galega en xuño de 2025. Villares dimitiu do seu cargo a principios de xuño tras coñecer que o TSXG decidira investigalo por un asunto que, naquela breve comparecencia que finalizou entre os aplausos do seu equipo, restrinxiu "á esfera persoal". 

No momento da súa dimisión, o exconselleiro declarouse "totalmente inocente" e afirmou que abandonaba o cargo para poder defender en mellores condicións sen que a polémica salpicase á institución.

Ao día seguinte, durante o acto de toma de posesión da súa sucesora, Marta Villaverde, Villares acudiu arroupado polo conxunto do Goberno galego e polo presidente da Xunta, Alfonso Rueda, con quen se abrazou. 

Rueda desexou entón que "se faga xustiza canto antes" con Villares para "poder recuperalo para a vida pública". Unhas palabras que xeraron controversia na oposición galega, que criticou a exhibición de apoio institucional antes de que a xustiza se pronunciase.

Ese mesmo 5 de xuño, Rueda revelou que coñecía desde febreiro a denuncia contra Villares. 

Segundo explicou o presidente galego, nese mes o entón conselleiro comunicoulle que fora chamado a declarar voluntariamente na comisaría de Ferrol e que a denuncia facía referencia a feitos ocorridos un par de meses antes.

PERFIL E FUTURO POLÍTICO

Licenciado en Veterinaria pola USC, Villares foi elixido alcalde de Cervo por maioría absoluta en 2007, resultado que revalidou en 2011, 2015, 2019 e 2023. Tras cesar no cargo de conselleiro, volveu ao seu posto de traballo na Xunta, cun destino próximo ao seu domicilio que o sindicato CIG denunciou como "trato de favor".

Co arquivo confirmado pola Audiencia Provincial, queda por ver se Rueda cumpre o seu desexo expresado publicamente de reincorporar a Villares á vida política galega. Nin o exconselleiro nin a Xunta pronunciáronse a este momento tras coñecer esta última resolución xudicial.