Rueda chega ao Debate coa ampliación “Bono Coidado” como bandeira dunha acción social que atacará a oposición

O presidente da Xunta, Alfonso Rueda, prepara un discurso centrado na economía, os servizos públicos e a innovación, pero será o reforzo do Bono Coidado o anuncio estrela da súa intervención no Debate sobre o Estado da Autonomía, que arrinca mañá no Parlamento galego.

A medida, que ofrece 5.000 euros anuais a familias que atenden en casa a persoas dependentes, ampliarase a 10.000 novos beneficiarios, alcanzando un total de 50.000 usuarios antes de que acabe a lexislatura, filtrou esta tade a Xunta . C

O Bono Coidado pode solicitar a través da sede electrónica da Xunta e está dirixido a persoas maiores ou dependentes con recoñecemento de grao II ou III, sempre que reciban atención na súa contorna familiar. Nos últimos anos, o programa foi eloxiado pola súa axilidade de tramitación, pero tamén recibiu críticas de colectivos sociais que advirten de que a axuda segue sendo insuficiente ante os altos custos dos coidados no fogar e as listas de espera que se acumulan nos servizos de dependencia.

Críticas da oposición antes do gran discurso

O Bloque Nacionalista Galego chega ao debate con escasa expectativa sobre o discurso de Rueda. O seu viceportavoz, Olalla Rodil, asegurou que espera “un refrito de anuncios” e acusou ao goberno do PPdeG de ser “incumplidor e carente de ideas” para atallar os problemas do país. Segundo os nacionalistas, moitas das promesas realizadas polo Executivo galego nos últimos anos “quedaron en titulares”, citando o fondo público-privado de 300 millóns ou o plan de centros de coidados intermedios entre os compromisos que seguen sen materializar.

Desde o #PSdeG, a viceportavoz parlamentaria Patricia Méndez criticou que gran parte das iniciativas aprobadas no pasado Debate de Estado “quedaron en enviar cartas ao Goberno central”, e reprochou ao presidente galego unha visión “idílica e afastada da Galicia real”. Os socialistas centrarán as súas intervencións na sanidade e a vivenda, dous ámbitos nos que consideran que a Xunta fracasou. Denuncian o aumento das listas de espera, o estancamento do plan de saúde mental e a falta de resposta ante a escalada de prezos da vivenda, con máis de 30.000 persoas inscritas no rexistro de demandantes.

Pola súa banda, Rueda defende que o seu Executivo avanzou na modernización de Sanidade, Educación e Servizos Sociais, e que o fixo “desde a autocrítica e a mellora continua”. Na Xunta insisten en que as contas públicas han crecido cada ano e que se están impulsando “servizos innovadores adaptados á nova realidade social galega”.

Vivenda e economía, outros eixos do debate

Ademais do bloque social, o presidente autonómico centrará parte do seu discurso na economía e o emprego, con mensaxes sobre o sector industrial, a enerxía e a produtividade laboral. O mandatario galego pretende destacar os resultados “positivos” da súa xestión e as medidas postas en marcha para “seguir mellorando os salarios e atraer investimentos”.

Outro dos asuntos que Rueda cualificou de “tema central da lexislatura” será a vivenda. O presidente adiantou que haberá “novidades” nesta materia, aínda que non deu detalles. Exporá novas fórmulas para ampliar as coberturas sociais e posibles incentivos fiscais relacionados co acceso á vivenda.

A idea que vertebrará todo o seu discurso será a de “Galicia Calidade”, concepto co que o líder do PPdeG pretende articular as tres liñas da súa intervención: economía, servizos públicos e innovación. Segundo fontes do Executivo, Rueda busca proxectar unha imaxe de estabilidade e compromiso, nun momento en que a lexislatura superou a súa ecuador e empeza a perfilar o escenario preelectoral.

Un debate nun momento de pouco foco en Galicia

O Debate de Estado da Autonomía servirá, en palabras do propio presidente, para “render contas ante a cidadanía e expor novos obxectivos”. Rueda disporá de tempo ilimitado para a súa intervención inicial, coa que pretende reivindicar a súa xestión e marcar a folla de ruta até o final da lexislatura.

O BNG e o PSdeG, mentres tanto, preparan críticas que apuntan á distancia entre os anuncios e a realidade social de Galicia, nun contexto onde a sanidade, os coidados e a vivenda sitúanse no centro da preocupación cidadá.

O debate, que se desenvolverá entre o mércores e o venres, prevese intenso e medirá a capacidade do Goberno galego de centrar o foco en Galicia nun momento en que a opinión pública está moi atenta á actualidade internacional, pola guerra de Irán, e estatal, polos xuízos sobre os casos de presunta corrupción de ex-dirixentes do PSOE e PP.