España e Portugal reciben 50.000 euros do Premio Princesa de Asturias polos incendios

As vítimas dos incendios de España e Portugal recibiron, da man da Unión Europea, a dotación de 50.000 euros do Premio Princesa de Asturias da Concordia 2017.

A entrega tivo lugar nas marxes do cume de líderes europeos nun acto no que participou o presidente do Goberno, Mariano Rajoy, o primeiro ministro de Portugal, António Costa e os presidentes do Parlamento Europeo, Antonio Tajani, e da Comisión Europea, Jean-Claude Juncker.

A dotación repartirase a partes iguais de 25.000 euros para cada país, e irán destinados ás vítimas e a paliar os danos dos incendios forestais que sufriron ambos os países nos últimos meses. No caso de España, a cantidade canalízase a través da Dirección Xeral de Protección Civil.

No acto, o presidente do Goberno agradeceu o xesto a Juncker, Tajani e o presidente do Consello europeo, Donald Tusk, e lembrou que se fai a unhas rexións afectadas por incendios "verdadeiramente duros" que provocaron a morte "de moitos seres humanos".

“A esencia” da Unión Europea

Rajoy tamén lembrou que o acto de entrega do premio en Oviedo foi "fermoso" e "europeísta", e viu no galardón o recoñecemento de "os esforzos e o traballo que levaron a cabo ao longo destes anos en defensa dos intereses dos europeos e unha aposta clara por unha maior integración", da que destacou como factor fundamental a “solidariedade” entre países.

O primeiro ministro portugués sumouse ao agradecemento por ese sentimento de solidariedade das institucións comunitaria, “a verdadeira esencia da natureza europea”.