PuntoGal investigará canto prexudica Google ao galego nas buscas

O Consello da Xunta autorizou un convenio entre a Consellería de Cultura, Lingua e Xuventude e PuntoGal, por valor de 64.000 euros, para levar a cabo actuacións orientadas á investigación da situación do galego nos resultados do buscador Google.

Tal e como avanzou o presidente autonómico, Alfonso Rueda, este luns, trátase dunha iniciativa coa que se continúa "pondo o foco no impulso do idioma no ámbito dixital".

Así, mediante este acordo, o Goberno galego achegará 30.000 euro para colaborar até 2028 con este estudo que ten como obxectivo profundar na monitorización das procuras na rede de termos en lingua galega.

A proposta chega despois de constatar que, desde 2022, os contidos en linguas consideradas minoritarias perderon visibilidade nos buscadores, o que levou a PuntoGal a iniciar unha investigación sobre a penalización no posicionamento realizada polo algoritmo de Google.

Para este novo proxecto, PuntoGal levará a cabo un control para obter as 50 primeiras posicións de procura de cada palabra crave indicada. Un labor que se realizará desde distintas localizacións xeográficas.

Ademais, inclúe encontros de traballo con expertos en SEO para constituír unha comunidade ao redor deste tema e desenvolver accións concretas. Tamén incorporará o seguimento e o impacto das procuras con intelixencia artificial, tanto en Google como noutros portais.

PATRIMONIO CULTURAL
Entre outros asuntos, o Consello da Xunta deu luz verde á renovación do convenio de colaboración entre a Consellería de Cultura, Lingua e Mocidade e o Consello Superior de Investigacións Científicas (#CSIC) para impulsar estudos de protección e difusión do patrimonio cultural que desenvolve o Instituto de Estudos Galegos Pai Sarmiento, cun importe total de 150.000 euros e até 2028.

Segundo indicou o Goberno galego nunha nota de prensa, esta sinerxía permitirá dar continuidade a dous traballos de investigación sobre o patrimonio e a identidade en Galicia e sobre as relacións de poder desde a Idade Media.

Precisamente, este último estudo centrarase principalmente nos séculos XIII e XVII, para contribuír á correcta identificación e axeitada contextualización de parcelas consideradas de "importante relevancia" no ámbito do patrimonio cultural galego.

CENTRO GALEGO DE ARTES DIXITAIS
Tamén, a Xunta deu o visto e prace ao proxecto para equipar con financiamento procedente da Unión Europea ao Centro Galego de Artes Dixitais, que se está construíndo na Cidade da Cultura, que abrirá no segundo semestre de 2027.

Mediante a colaboración entre a Axencia para a Modernización Tecnolóxica de Galicia (Amtega) e a Fundación Cidade da Cultura, o Goberno galego destinou 1,5 millóns de euros procedentes dos fondos Feder para a adquisición da tecnoloxía necesaria para pór en marcha este novo equipamento.

Deste xeito, o financiamento comunitario cobre o 60 % do proxecto, de maneira que o investimento total alcanza os 2,5 millóns de euros distribuídos entre 2026 e 2027.

Actualmente xa finalizaron os traballos de adecuación do espazo e estanse levando a cabo actuacións para completar a cuberta exterior, asegurando a súa integración coa arquitectura singular do complexo. Así, a seguinte fase será a adquisición da tecnoloxía, mediante procedementos de contratación pública.

Desta maneira, contará con tecnoloxía "punteira" no ámbito das experiencias inmersivas e da realidade virtual e aumentada, así como con sistemas de son envolvente e instalacións audiovisuais de última xeración.