O príncipe Andrew, detido pola Policía do Reino Unido

A Policía do Val do Támesis confirmou na mañá deste xoves a detención dun home sexagenario de Norfolk, sen nomealo de forma explícita seguindo as normas policiais británicas, aínda que a #BBC e outros medios confirmaron que se trata de Andrew Mountbatten-Windsor. Segundo o comunicado oficial, o arresto responde á sospeita dunha “mala conduta no desempeño dun cargo público”.

Os investigadores rexistraron domicilios en Berkshire e Norfolk, incluídos terreos próximos á leira de Sandringham, onde Andrew reside desde que abandonou a súa vivenda en Windsor. A actuación prodúcese tras unha avaliación previa dunha denuncia sobre a presunta entrega de información confidencial durante os anos en que o entón príncipe actuaba como representante comercial do Reino Unido no estranxeiro.

A Policía subliñou que o arresto non implica culpabilidade e que o detido continúa baixo custodia. As autoridades pediron “prudencia” aos medios para non interferir nunha causa activa, recalcando a necesidade de preservar a integridade do proceso xudicial.

Conexións co caso Epstein

A detención supón un xiro significativo nunha investigación que se relaciona cos vínculos do exduque de York con Jeffrey Epstein, o magnate estadounidense condenado por delitos sexuais e falecido en prisión en 2019. Segundo diversos medios británicos, o caso podería implicar documentos oficiais compartidos entre Andrew e Epstein durante a súa etapa como enviado especial de comercio, aínda que polo momento a investigación limítase ao posible delito de mala conduta pública.

Andrew, que negou repetidamente todas as acusacións, xa fora apartado das súas funcións públicas en 2019 tras a polémica entrevista concedida á BBC na que defendeu a súa inocencia respecto das denuncias de abusos formuladas por unha das vítimas de Epstein. A partir dese momento, perdeu os seus patrocinios e deixou de representar oficialmente á monarquía.

O arresto ocorre ademais o mesmo día do seu 66 aniversarios, un detalle que a prensa británica non pasou por alto na súa cobertura. Algunhas imaxes captadas esta mañá mostraban vehículos policiais accedendo ao perímetro de Sandringham, unha escena impensable hai apenas uns anos no corazón da realeza británica.

Repercusións e silencio en Buckingham

Até o momento, a Casa Real británica non emitiu ningún comunicado oficial sobre a detención do irmán do monarca. O palacio de Buckingham mantén silencio, seguindo a súa habitual política de non comentar asuntos legais que involucren a membros da familia.

No Reino Unido, a noticia causou unha enorme conmoción mediática e política, ao tratar do primeiro arresto dun membro directo da familia real na historia recente. Os comentaristas coinciden en describir o feito como “sen precedentes” e dunha “gravidade institucional notable”, aínda que insisten en que é prematuro extraer conclusións.