R lanza un repetidor doméstico para combater a falta de cobertura móbil en interiores en Galicia

A cobertura móbil no interior dos edificios segue sendo unha materia pendente en Galicia. Non se trata só dunha cuestión de antenas ou de infraestrutura exterior: a arquitectura tradicional galega, cos seus muros de granito de gran espesor, converte moitas vivendas e locais en espazos onde o sinal simplemente non chega. Para abordar este problema, o operador R puxo en marcha o servizo cachocobertura, baseado nun repetidor doméstico autoinstalable —tecnicamente denominado femtocelda— que funciona a través da conexión de fibra óptica do fogar.

Un problema con nome propio en varias cidades

Segundo datos do grupo MasOrange, ao que pertence R, os problemas de cobertura interior afectan a localizacións concretas de case todas as cidades, así como a municipios máis pequenos como Boiro, Carballo, Oleiros. Nestas contornas interiores, a causa non adoita ser a falta de investimento en rede exterior, senón as características físicas da construción: sotos, locais afastados do punto de acceso, edificios históricos ou construídos materiais que atenúan o sinal de forma significativa.

O dispositivo proposto por R instálase sen necesidade de técnico e xera unha pequena cela de cobertura dentro do inmoble. A compañía tamén lembra que existe unha alternativa sen custo adicional: o servizo VoWiFi, que permite realizar chamadas de voz a través da rede wifi cando a cobertura móbil é insuficiente, aínda que a súa calidade depende da conexión a internet dispoñible.

O 5G chega aos municipios máis pequenos

En paralelo, R e MasOrange avanzan no despregamento de 5G en municipios rurais mediante o plan UNICO 5G_Redes Activas, financiado polo Ministerio para a Transformación Dixital con 70 millóns de euros de investimento até finais de 2026. O programa ten como obxectivo cubrir preto de 250 concellos galegos de menos de 10.000 habitantes, entre eles Negueira de Muñiz, o menos poboado de Galicia con 237 veciños segundo o INE 2025.