Salva a vida de milagre tras esmagar unha árbore de 3 toneladas o coche que conducía en Cuntis

Unha moza de 20 anos, veciña de Caldas de Reis, salvou a vida de maneira milagrosa despois de que un piñeiro duns 3.000 quilos caese este mércores sobre o seu coche cando circulaba pola estrada EP-8008, á altura de Cesariños, na parroquia de San Clemente. O vehículo quedou completamente esnaquizado, pero a condutora logrou saír con feridas leves e foi trasladada ao Hospital Montecelo de Pontevedra.

O sinistro ocorreu sobre o tres da tarde, nunha xornada marcada polos fortes ventos e choivas provocados pola borrasca Nils, que mantén en alerta a toda Galicia. Segundo os servizos de emerxencia, a árbore esborrallouse de forma repentina sobre o coche, da marca Dacia modelo Sandero e cor azul, cando a moza regresaba a casa tras a súa xornada laboral.

A pesar da violencia do impacto, a muller permaneceu consciente en todo momento. Foi ela mesma quen contactou co 112 Galicia, informando de que o tronco esmagara o seu vehículo e que non podía saír. O seu estado de nerviosismo era evidente, pero quen a rescataron destacaron que estaba “máis asustada que ferida”.

Rescate complicado pero exitoso

Ao lugar acudiron rapidamente Bombeiros do Salnés, Protección Civil de Caldas e Cuntis, ademais de efectivos da Garda Civil de Tráfico e persoal sanitario de Urxencias Sanitarias. A operación de rescate foi complexa debido ao peso da árbore e ás condicións meteorolóxicas, con refachos de vento que superaban os 80 quilómetros por hora no momento do suceso.

Os equipos de emerxencia lograron finalmente liberar á nova, que quedara a trapadaentre o tronco e o asento dianteiro do coche. Segundo relataron os intervinientes, a árbore apoiouse sobre o repousacabezas e tombou os asentos, o que evitou que o impacto fose fatal. “Foi cuestión de milímetros”, admitiron os servizos de rescate. 

O Concello de Cuntis compartiu nas súas redes sociais unha imaxe do accidente e agradeceu o labor dos equipos de emerxencia que participaron no operativo. Na súa publicación, explicaron que a árbore pesaba ao redor de tres toneladas e destacaron a fortuna da vítima, cuxa vida non correu perigo.

Veciños da zona, que se achegaron tras ouvir o estrondo do esborralle, recoñeceron sentir “pánico” ao ver o coche case  partido en dous. A nova, visiblemente afectada, non deixaba de chorar mentres pedía axuda e chamaba á súa nai, segundo narraron as testemuñas.

Galicia, baixo os efectos da borrasca Nils

O accidente prodúcese nunha xornada complicada en toda a comunidade polo paso da borrasca Nils, que activou avisos por ventos intensos, choivas persistentes e ondada en boa parte do territorio galego. En Pontevedra, a caída de árbores, ramas e elementos urbanos provocou incidencias en varios municipios, entre eles Vilagarcía, Marín e Poio.

Os servizos de emerxencia recomendan extremar a precaución en zonas arboredos e evitar os desprazamentos innecesarios mentres se manteña a alerta. As autoridades locais lembraron que a combinación de solo saturado de auga e fortes refachos de vento aumenta considerablemente o risco de esborralle de árbores, como o ocorrido en Caldas de Reis.

Aínda que todo apunta a que o accidente foi consecuencia directa do temporal, as forzas de seguridade investigan as condicións do terreo e da árbore para determinar si existían factores de risco previos. De momento, nin o Concello de Caldas nin a Deputación de Pontevedra fixeron declaracións sobre o mantemento da vía afectada.

No que vai de semana, esta é unha das incidencias máis aparatosas rexistradas en Galicia polos efectos da borrasca Nils, que continuará afectando á comunidade durante as próximas horas.