A Xunta reitera que abrirá os centros de crises 24 horas, pero se resiste a pór unha data á súa inauguración

As advertencias do Ministerio de Igualdade e mesmo do #PSdeG ao redor dos deberes que a Xunta de Galicia ten aínda por facer con respecto aos centros de crises 24 horas pairas as vítimas da violencia sexual contrastan coa tranquilidade que transmiten desde a Consellería de Política Social, onde a mensaxe a este respecto é de absoluta calma. Nese sentido, insisten en que nin se lles pasará o prazo para a apertura das instalacións nin se perderá diñeiro, xa que se cumprirá coa palabra dada ao Goberno de España, pero sen precisar a data para a apertura dos centros. 

"NON HAI RISCO DE PERDER O FINANCIAMENTO"

Desde Política Social, respondendo as cuestións que lle trasladou este diario a semana pasada, detallan que a construción destas instalacións "xa está finalizada" e que nestes momentos "atópanse na última fase da licitación". "Estarán en funcionamento ao longo do último trimestre deste ano 2024. Deste xeito, Galicia contará cos centros de crises antes do prazo establecido, polo que non existe risco de perder o financiamento dos fondos europeos", subliñan na súa resposta a Galiciapress.

Ademais, desde San Caetano recalcan que non só cumprirán a súa palabra, senón que mesmo o Goberno de Galicia irá un paso máis aló: "Son cinco centros, é dicir, un máis dos esixidos pola Unión Europea que obriga á construción dun destes centros por provincia. Estarán situados nas áreas sanitarias de: Santiago, Ferrol, Lugo, Ourense e Vigo".

"Estes centros ofrecerán servizos de atención psicolóxica, xurídica e social. Proverán apoio e asistencia en situacións de crises para vítimas, familiares e persoas da súa contorna, de aí a decisión do Goberno galego de situalos dentro das áreas sanitarias. Ademais, inclúen un acompañamento e información telefónico e presencial as 24 horas do día e todos os días do ano", indican desde a Consellería que dirixe Fabiola García.

No mesmo orde, desde a Xunta dirixen as súas críticas ao Goberno de España pola "falta de información" e a "nula colaboración coas comunidades autónomas no deseño previo do proxecto", o que afectou de forma decidida á posta en marcha dos centros de crises que se abrirán, previsiblemente, este outono.