Entendo que, desde unha posición netamente política e populista, o alcalde de Vigo, Abel Caballero, defenda o aeroporto de Peinador, pero as cifras non lle acompañan polo seu tamaño. El sábeo, é intelixente, pero, de face á súa parroquia, ten que facer todo o contrario do que os datos desmenten unha e outra vez na súa enérxica defensa dun aeroporto que hai que situar xeograficamente, en termos de viabilidade, en Galicia, e non só na cidade de Vigo.

A realidade da demanda dos tres aeroportos galegos é a dunha comunidade cuns fluxos importantes de pasaxeiros e de turistas en aumento, pero á vez estacionais en épocas de tempada alta, o que leva potenciar unha macroestructura, como é o aeroporto de Santiago, que debe ser, por lóxica e non por centralismo, a terminal principal de Galicia. Desde un punto de vista localista, enténdese a postura do alcalde olívico, pero, con cifras na man, a súa lexítima defensa viguesa non beneficia en nada ao conxunto de Galicia.

Construíuse unha gran infraestrutura en Santiago como aeroporto central da comunidade autónoma, cun investimento de 230 millóns de euros. As outras dous terminais, de Alvedro e Peinador, non deberían operar de forma estacional, condicionadas por un zigzag crónico no volume de pasaxeiros, nin en función das axudas da administración pública, xa que iso suporía cuestionar a viabilidade das dúas instalacións aeroportuarias, por moito que as defendan os seus alcaldes cos seus intereses partidistas e non con datos técnicos na man. As dúas instalacións citadas deberían operar baixo unha demanda de tráfico aéreo realista e sen competir co aeroporto central da comunidade, en Santiago. A especialización das terminais da Coruña e de Vigo é a clave para entender a demanda actual aeroportuaria do conxunto da rexión galega, pequena para tres terminais de pasaxeiros, a pesar do importante incremento de turistas no caso das Rías Baixas, que chegan á nosa terra a través doutras vías de comunicación, como as autovías, os cruceiros turísticos ou a AVE, aposta na que a administración do Estado está a investir de forma considerable.

Tres cidades, tres aeroportos, tres universidades e tres localismos que en nada benefician ao conxunto de Galicia, por non haber exposto todo iso desde os seus inicios con informes técnicos e serios. Os alcaldes son un obstáculo, ao utilizar un diñeiro público que é de todos os galegos para uns aeródromos nos que só un debe ser a terminal principal de pasaxeiros e os outros dous, especializados e complementarios entre si, segundo ditaminan os expertos, os organismos competentes e Aeroportos Españois e Navegación Aérea (AENA), entidade que prevé investir no período 2027-2031 uns 200 millóns de euros nas tres infraestruturas galegas.

Sirva de exemplo, aínda que á inversa, que a cidade de Pontevedra terminou comprendendo co tempo a descentralización administrativa provincial cara á cidade de Vigo para achegar a administración ao administrado, xa que había unha demanda, sen prexuízo para a capital provincial, aínda que isto xa daría para outro artigo. O que non se pode é forzar a viabilidade de dous terminais a costa do aeroporto de Lavacolla/Rosalía de Castro, despois do investimento millonario que no seu día se realizou nel co fin de que fose a terminal principal de Galicia, como sempre o foi.

Segundo datos publicados, os tres aeroportos galegos pecharían o ano 2024 con case seis millóns de pasaxeiros, sendo o que máis crece o aeroporto de Lavacolla/Rosalía de Castro, segundo datos publicados polo Economista, mentres que o aeroporto do Porto (Sá Carneiro) superaría no mesmo ano os 16 millóns, máis do dobre que as tres terminais galegas xuntas. Hai que engadir que a citada cidade é o núcleo industrial e económico do norte de Portugal, o que deixa moi claro que a actual política aeroportuaria só está a favorecer á terminal lusa, que é a que ten máis tráfico aéreo do noroeste peninsular.

E, paradoxalmente, quizá esa sería a solución actual, algo que só cambiará cando acaben os localismos do tres rexedores, que non teñen nada que dicir cando se trata de falar da viabilidade dunhas infraestruturas nas que AENA, os organismos competentes estatais e os técnicos teñen a última palabra, e deben explicar á cidadanía, de maneira pedagóxica, técnica e clara, que a actual división en tres terminais no que respecta ao tráfico aéreo de pasaxeiros non é nin competitiva nin viable. Na especialización está a posible solución. Segundo esta última afirmación, en Galicia todo o mundo sería localista, menos, como é lóxico, Abel Caballero.