​Intervidos case 200 quilos de marisco en controis en Arousa e a ría de Pontevedra

Axentes do Servizo de Gardacostas de Galicia, dependente da Consellería do Mar, interviñeron case 200 quilos de marisco e 172 útiles de pesca en controis realizados o martes na Illa de Arousa e na Ría de Pontevedra.

Segundo informa a Consellería do Mar, a maioría do produto foi intervido no control realizado na Illa de Arousa, no porto de San Xulián, onde os axentes requisaron 167 quilos de marisco e 17 útiles de pesca. Os gardacostas requisaron os aparellos, que estaban fondeados no porto, e o marisco que contiñan, debido a que todo estaba sen identificar.

Case todo o marisco intervido nesta actuación, 125 quilos, era centola e tamén requisaron 18 quilos de nécora. A maioría desta especie estaba ovada e en veda.

A maiores neste control tamén se interviñeron 12 quilos de camarón e 12 de ameixa. Todas estas especies estaban no interior dos útiles incautados, unha gaiola, 12 sacos e catro capachos.

Por outra banda, noutros controis realizados na Ría de Pontevedra, os axentes incautáronse 155 nasas que estaban sen identificar e o peixe e marisco que contiñan, 16 quilos de polbo de talla antirregulamentaria, e 1,5 quilos de peixe variado.

Estas actuacións, concreta Mar, enmárcanse no conxunto dos controis que efectúa diariamente o Servizo de Gardacostas para evitar a extracción e comercialización ilegal de produtos pesqueiros e marisqueiros.