O PPdeG anuncia cambios nas listas para as principais alcaldías

Miguel Tellado espera superar en 2019 o castigo recibido nas pasadas municipais.

Redacción
| Sábado, 27 de Xaneiro de 2018, 12:57

Tellado, con responsables locais en 2017. Foto: PPdeG

O secretario xeral do PPdeG, Miguel Tellado, avanzou que os populares preparan cambios nas candidaturas das cidades para as eleccións municipais do próximo ano, nas que esperan recuperar "a confianza" perdida nos comicios de 2015, cando só lograron facerse coa alcaldía de Ourense.

Tellado foi entrevistado na mañá deste sábado na Radio Galega. Alí, limitouse a responder que o PP "si" que estuda reconfigurar as listas nas urbes para lograr un mellor resultado dentro dun ano e medio, aínda que non quixo entrar en máis detalles.

"Do que se trata é de ser capaces de elixir os mellores equipos que acompañen a eses candidatos e elaborar proxectos de futuro para cada unha desas cidades", remarcou Tellado, que fixou como reto recuperar os gobernos das sete urbes galegas, así como as catro deputacións.

Así, tras admitir que o PP tivo un "problema" nas eleccións de 2015, indicou que os populares "xa pagaron nas urnas o desgaste de determinados casos de corrupción".

"Eu estou seguro de que neste partido non estivemos á altura das circunstancias e probablemente non actuamos coa contundencia que a cidadanía reclama fronte a determinados casos", recoñeceu.