​Marea Atlántica vota se cambia a estrutura para as municipais

O alcalde da Coruña, Xulio Ferreiro, xustificou os cambios na organización de Marea Atlántica, como a creación dunha coordinadora, que expón o documento que os seus membros poden votar ata este sábado, no marco do proceso de 'Marea Viva' iniciado para as eleccións municipais.

Con todo, dixo que os compromisos de Marea Atlántica son "inalterables" e que o "espírito" co que se creou goza "de boa saúde", ao ser preguntado a este respecto na rolda de prensa que ofreceu para informar dos asuntos aprobados en Xunta de Goberno.

A preguntas dos xornalistas, defendeu a necesidade de adaptarse ás "circunstancias", incidindo en que a situación de Marea Atlántica non é agora a mesma que cando promoveu un proceso de confluencia para concorrer ás eleccións municipais de 2015.

Sobre iso, dixo que, nese momento, o obxectivo era que "diversas partes", en alusión ás distintas formacións que apostaron por este proceso, "se visen representadas nunha soa lista". "Agora xa non existen diferentes partes, séntense todas as partes formando parte dunha unidade", apostilou.

PROCURA DO CONSENSO

En canto aos textos que recolle o documento que se sometará a votación, -para decidir entre o modelo actual ou os cambios expostos- dixo que foron redactados "por unhas cen persoas" e con "consenso". "Incorporando a todas as sensibilidades que quixeron estar no proceso", engadiu a este respecto.

Entre os cambios introducidos, destacou a posibilidade de que poida existir unha coordinadora "que sexa elixida por consenso" e introducir dentro da organización "un laboratorio de ideas, de proxectos, para abrilos á sociedade".

En liña co seu discurso, insistiu en que o documento -o único que se presentou neste proceso- é o resultado dun traballo coa presenza "de compañeiros da dirección local de Podemos, de Esquerda Unida, Equo, Anova e moita xente que non ten militancia". Por outra banda, subliñou que que se busca facer listas "que integren a todo o mundo e no que todo o mundo se sinta representado".

EQUIPOS COHESIONADOS

Con todo, admitiu que non se formula un sistema de listas abertas coma o que se elaborou para elixir os seus candidatos nas anteriores eleccións municipais. "Temos que garantir que os equipos que se presenten sexan cohesionados pero tamén representativos".

Por este motivo, explicou que o documento que se somete a votación expón que, por exemplo, en caso de existir dúas listas se aplique un sistema "proporcional". "Se hai dúas listas que teñan un 60 e un 40%, a lista resultante será dun 60 e un 40%", precisou sobre o proceso para elixir os candidatos para as municipais.