Navantia asegura que perderá un contrato dun buque pola folga

A empresa Navantia comunicou que o armador do buque 'Excalibur', que tiña previsto realizar varias tarefas de mantemento e reparación no estaleiro de Ferrol, deu de prazo ata a tarde do próximo luns para decidir se traslada o barco ao interior da ría departamental ou se aborta a operación e se despraza a outro estaleiro para completar os traballos.

O barco condicionou o seu acceso ás instalacións á antiga Bazán a que se poña fin na mañá do luns á folga indefinida que manteñen os operarios da industria auxiliar desde o pasado 5 de outubro, convocada en solitario polo sindicato CIG.

O buque transporta gas natural licuado (LNG) e ten bandeira belga. Durante as últimas xornadas está a percorrer a zona exterior da costa ferrolá á espera de ingresar nos estaleiros ferroláns para acometer unha serie de reparacións.

As previsións apuntan a que este buque, cunhas dimensións de 277 metros de eslora e 43 de manga e construído no ano 2002, terá que enfrontarse a un proceso importante de carenado.

Para iso, estímase que será necesario empregar ata 47.000 horas de traballo para levar a cabo as tarefas previstas, das cales a maioría, unhas 42.000, correrían a cargo de traballadores das industria auxiliar, mentres que o resto, unhas 5.000 horas, serían asumidas de maneira directa polos propios traballadores de Navantia.