Os traballadores das auxiliares de Navantia acusan á patronal de mentir

Manifestación da industria auxiliar.

Os traballadores da industria auxiliar que operan nos dous estaleiros da empresa pública Navantia na ría de Ferrol, que permanece en folga indefinida desde o pasado 5 de outubro, protagonizaron no mediodía deste luns unha manifestación que os levou desde a porta principal do centro de traballo ata o Concello.

Así, na fachada principal do Concello colocaron unha pancarta que portaron durante a marcha, baixo o lema 'Acordos Auxiliares 2001-2017 - Unidade Obreira e dignidade - Acordos Xa!!!'.

Uno dos integrantes da executiva comarcal da CIG, Ramón Fernández, único sindicato convocante desta folga, acusou á patronal de faltar á verdade por asegurar que os traballadores reclaman subidas salariais de ata un 30%.

"Isto non é así, son afirmacións falsas", censurou. Así, sinala que as subidas que se demandan "poden estar entre un 5% e un 14% para especialistas e oficiais de segunda, mentres que no caso de oficiais de primeira, que son os que en teoría terían unha maior subida, non son nin a metade do que fala a patronal".

O tamén integrante de CIG-Industria deu algúns exemplos de auxiliares que están a pagar os acordos do ano 2001. "Están a gañar contratos, como Maessa, Serfrimec ou Bulbo, que pagan estas táboas salariais que nós reclamamos para todos os traballadores", explica.

Por iso, chaman aos que incumpren a "mirar como rebaixar os custos de produción, como racionalizar os horarios, rebaixando as horas extraordinarias ou o traer operarios de fóra, que tamén eleva os custos de produción".

FOLGA LEGAL

Ramón Fernández tamén enviou "unha mensaxe a Navantia, xa que parece que se está tratando de criminalizar os traballadores por este paro".

"O dereito de folga existe, é un dereito básico, está perfectamente lexítima e é para defender os intereses dos traballadores", censurou. "Responderemos e actuaremos con toda contundencia se se nos leva a xuízo, xa que non nos imos amedrentar en canto ás ameazas de Navantia, porque forman parte do guión", agrega.

Fernández Alfonzo tamén criticou "a dilatación no tempo das negociacións", xa que acusa á patronal de non trasladar ningunha proposta concreta, mentres a CIG foi "a que puxo sobre a mesa negro sobre branco" sobre as reivindicacións.

"Non coñecemos ningún tipo de contraoferta, o único que parece que se busca é bloquear e boicotear o diálogo", lamenta. Tamén reprocha a Navantia e a patronal que "só se dedica a lanzar ameazas sobre a CIG", "deixando os empresarios sen ningunha responsabilidade".

NOVA MEDIACIÓN E MANIFESTACIÓN

Desde as 16,30 horas deste luns está a celebrarse un novo encontro para tratar de lograr desbloquear este conflito laboral, neste caso na cidade da Coruña, na sede provincial de Inspección de Traballo, a instancias do Consello Galego de Relacións Laborais.

Ademais, para o vindeiro xoves, 19 de outubro, está convocada unha manifestación por parte destes traballadores de empresas auxiliares. Fan un chamamento aos cidadáns de Ferrolterra para que se unan nesta marcha que partirá desde a entrada principal de Navantia Ferrol e que discorrerá por varias rúas e avenidas da cidade naval

NAVANTIA RECLAMA UNHA INDEMNIZACIÓN

A empresa naval pública Navantia presentou este luns unha demanda ante o Servizo Provincial de Mediación e Conciliación (SMAC) de Ferrol, paso previo para a denuncia ante o Xulgado do Social, valorando en 1.780.000 euros os danos directos causados pola folga.

Navantia fai responsable desta situación ao comité de folga e a sindicato CIG, asegurando que "as actuacións levadas a cabo teñen un carácter abusivo que excede a legalidade do dito dereito".