Que democracia gañou?

A Policía Nacional no Colexio Ramon Llull de Barcelona este domingo 1 de outubro.

O que estaba planificado por parte dos autores intelectuais da "consulta" cumpriuse: que a Policía Nacional e a Garda Civil interviñesen nos centros de votación para quitar as urnas, tal e como decidira unha maxistrada, por considerar que a consulta era ilegal.

O cumprimento da orde xudicial foi levada a cabo polos corpos nacionais, xa que a inmensa maioría de Mossos d'Esquadra obedeceron aos seus xefes políticos e foron de bos da película, servindo non ás leis senón aos seus xefes políticos.

As cargas da Garda Civil e a Policía Nacional -que non nos gustan porque nos lembran outras épocas vividas e é moi triste que se producisen feridos- foron a consecuencia de cumprir as ordes da xustiza, da que a policía catalá pasou olímpicamente. O motivo da intervención era a de quitar as urnas para que non se puidese votar. Ante a imposibilidade de poder entrar nos centros, tiveron que utilizar outros métodos. 

Que se pensaban que ían facer? Regalar caraveis? A irresponsabilidade é das institucións e dos dous provocadores, Cuixart e Sànchez, que en todo momento incitaron a cidadanía a saír á rúa, a ocupar as sedes das votacións, a levar nenos e persoas maiores para que sirvan de escudo fronte ás forzas represoras. É unha postura moi valente, utilizar estes dous colectivos vulnerables como escudos.

Mentres, algúns Mossos e Mossas moi sensibles abrazábanse chorando pola súa incapacidade para cumprir co seu traballo. Gustaríame que cando un cidadán cometa unha infracción se poña a chorar en solidariedade co infractor. Isto vai servir de precedente para todos os cataláns, sobre todo, para os que cumpriron a lei e se manifestaron en silencio, sen acudir á chamada duns golpistas.

O Govern da Generalitat e a parte independentista do Parlament saltaron as leis, cargándose dunha plumada o Estatuto, a Constitución e os dereitos da outra metade do Parlament. Como estas actitudes fascistas de aprobación de leis ilegais lles saíron gratis, pois foron avanzando, sen calcular -ou si?- as consecuencias da convocatoria dunha fraude de consulta que xa comprobamos como trematou. O preocupante da situación é o que vén a partir de agora. Máis feridos ou mortos? Esperemos que non.

Os instigadores mentiron desde o principio que expuxeron a "consulta". O seu discurso sempre foi o de "queremos poñer as urnas para que a xente poida votar e exprese a súa opinión sobre unha hipotética independencia", pero a verdade, como se está comprobando, era proclamar a República Catalá.

Saben que iso non vai ser posible e as consecuencias xurídicas van levar á aplicación do famoso artigo 155 e o que iso leva. Por iso, os irresponsables de Sànchez e Cuixart -que non foron elixidos por ninguén- xunto a uns sindicatos chaman a unha folga xeral para dar a sensación de que o pobo catalán está con eles. Que pobo catalán?

Dicir que gañou a democracia é un insulto a ela. Que democracia gañou, a súa? A democracia tamén é respectar as leis, non adaptalas aos intereses duns e despois invocar a ela para xustificar o inxustificable. Este domingo foi un día moi triste para a democracia.

Coa actitude irresponsable do Govern da Generalitat, a presidenta do Parlament e dos apéndices o que se conseguiu é espertar de novo a ETA e, se o PP contribuíu a fabricar independentistas, estes contribuíron agora a que creza a ultradereita, mentres o resto de cidadáns deste país -que non son nin unha cousa nin a outra- miran perplexos e preocupados a situación.

"As democracias observan máis coidadosamente as mans que as mentes de quen as goberna", dicía Alphonse de Lamartine alá polo século XVIII.