O PP descarta apoiar a expropiación de Meirás á familia Franco
Tellado di que os herdeiros do ditador deberían devolver o pazo e que a Fundación debería disolverse, pero que é legal.
Tellado evita falar de espolio.
O secretario xeral do PPdeG, Miguel Tellado, considerou que a familia Franco "debe reflexionar" e "devolver" o Pazo de Meirás "á titularidade pública".
"É evidente que existen dúbidas sobre a forma en que a familia Franco adquiriu o Pazo de Meirás", sinalou, nunha entrevista nos Almorzos da Radio Galega. Alí mostrouse partidario de buscar fórmulas legais que permitan que este inmoble regrese ás institucións públicas, aínda que rexeitou apoiar unha expropiación.
Doutra banda, considerou que a Fundación Francisco Franco debería disolverse, aínda que lembrou que só un xuíz pode ilegalizar este organismo, que está dentro da lei.
Con respecto ao curso político, situou como prioridade a recuperación económica e "trasladar a mellora da economía ás familias", ademais de lograr "subidas salariais".
Finalmente, sobre o desafío soberanista de Cataluña, Tellado aposta pola moderación e rexeita os pasos do Goberno catalán "cara a unha confrontación innecesaria e improductiva". Do mesmo xeito, ironizou con que Pedro Sánchez "tenta apagar o lume con gasolina", en alusión á súa última proposta sobre as nacionalidades históricas.
Escribe o teu comentario