O PP accede a debater que Meirás pase a ser de titularidade pública

|

Pazomeiras



Aínda que, como se esperaba, a maioría parlamentaria do PPdeG volveu bloquear a celebración dun pleno extraordinario, os populares accederon á a proposta do PSdeG de analizar como reverter a propiedade do Pazo de Meirás, actualmente en mans da familia Franco, para que sexa de titularidade pública.


Este era un dos asuntos que a oposición pedía debater nun pleno extraordinario antes de que concluíse agosto, xunto coa transferencia da AP-9 a Galicia e a reforma da Lei de saúde.


"Ningún destes temas é suficientemente urxente como para aprobar un pleno extraordinario", obxectou o portavoz do PP na Cámara galega, Pedro Puy, quen incidiu en que "nada cambiou" sobre a citada autoestrada como para requirir a comparecencia do presidente da Xunta e que a reforma normativa terá un trámite parlamentario que permitirá un amplo debate respecto diso.


No que incumbe ao Pazo de Meirás, Puy Fraga considerou "interesante" a proposta do seu homólogo no PSdeG, Xoaquín Fernández Leiceaga, de abrir "unha comisión especial" con todas as administracións implicadas para "ver se existen procedementos legais" que permitan reverter a cesión do inmoble ao ditador.


OS HERDEIROS DE FRANCO EXHIBEN A PROPIEDADE


Ao fío diso, os grupos tamén cuestionaron que a Fundación Francisco Franco se poida encargar das visitas a este pazo, catalogado como ben de interese cultural (BIC), tanto polas mensaxes que difunde como pola xestión dos accesos.


Para demostralo, a portavoz do BNG, Ana Pontón, chamou ao teléfono que se publicita para reservar as visitas ao pazo e que, do mesmo xeito que no resto do mes de agosto, está "apagado". "E a Xunta non fai nada", censurou.


Pola súa banda, Antón Sánchez, viceportavoz parlamentario de En Marea, fixo fincapé en que as manifestacións dos responsables desta fundación son "impresentables" e que se trata de algo inadmisible "nun estado democrático". "E se a lei as permite, haberá que cambiar a lei", sentenciou.


Na súa quenda, Pedro Puy deu conta de que polo momento non se rexistrou ningún incidente, nin en relación ao acceso ás instalacións nin por "apoloxía do franquismo" durante as visitas. De darse, asegurou que a Xunta acudirá á Fiscalía.


Ademais, concordou con que a cesión deste pazo ten "un vicio de orixe", posto que se produciu durante a Guerra Civil, e censurou a "exhibición" da súa propiedade por parte dos herdeiros de Franco.


Tras estes reproches á familia do ditador, o que deixou claro Pedro Puy é que o seu partido non é "franquista", senón "un partido democrático". E, tras lembrar que xa condenou o franquismo en distintas ocasións, opinou que a actitude dos herdeiros e da fundación "non favorecen a convivencia democrática".


DEVOLVER O PAZO AO POBO


Por tanto, a xuízo do deputado popular, o "lóxico" sería que o Pazo de Meirás fose de titularidade pública, de modo que sostivo que a familia do ditador debería "darse conta" de que debería devolvelo a quen lla deu a Franco pola súa condición de xefe de Estado: o pobo.


Escoitado isto, Ana Pontón anticipou que levará iniciativas ao pleno para poñer a proba o "compromiso" do PP "coa democracia", algo que tamén Antón Sánchez cuestionou. "Pero se se suman ao bando democrático, benvidos sexan", resolveu.


Pola súa banda, Leiceaga aplaudiu as declaracións de Puy, tendo en conta que "esta sociedade necesita despexar a dúbida do compromiso do PP co réxime democrático", de modo que desexou que se logre reverter a propiedade do Pazo de Meirás ben "cun ditame técnico" ou a través dun cambio normativo.


SITUACIÓN DA AP-9


Á marxe deste asunto, os grupos abordaron a transferencia a Galicia da AP-9, un asunto que a oposición ve frustrado pola "submisión" de Feijóo aos intereses do seu partido no goberno.


E, mentres o socialista sostivo que os encontros de Feijóo con Mariano Rajoy en actos de partido durante o verán serían "un bo momento" para abordar ese asunto, o representante do grupo rupturista criticou que o mandatario autonómico antepoña os intereses do seu partido e das "empresas" aos galegos.


Fronte ás críticas, Puy aplaudiu o convenio co Ministerio de Fomento para reducir as peaxes en sete millóns de euros á vez que asegurou que o seu partido "non tira a toalla" á hora de reivindicar a infraestrutura.


REFORMA SANITARIA


Finalmente, sobre a reforma da Lei de saúde de Galicia, as críticas da oposición abarcaron tanto a "aleivosía" de iniciala en agosto como o seu contido, pois basea a xestión dun servizo público en "criterios economicistas", en palabras de Sánchez.


"É un novo ataque á sanidade pública", conveu Ana Pontón, mentres Leiceaga lamentou a "perda de calidade" especialmente para os cidadáns que viven nas áreas máis pequenas. Así é que lamentou que a mellora económica da que fala o PP non se traduza nun "reforzo" da atención sanitaria.


En cambio, o portavoz do PPdeG no Pazo do Hórreo xustificou a modificación na procura de "melloras" para o sistema e no seu "enfoque" cara ao paciente. A proba que esgrimiu son as obras iniciadas en varios dos hospitais comarcais.



relacionada A Xunta rexeita levar a iniciativa nas reclamacións sobre Meirás
relacionada O PP volve impedir que Feijóo dea explicacións sobre a AP-9

Sen comentarios

Escribe o teu comentario




He leído y acepto la política de privacidad

No está permitido verter comentarios contrarios a la ley o injuriantes. Nos reservamos el derecho a eliminar los comentarios que consideremos fuera de tema.

Galiciapress
Praza da Quintana, 3; 15704 Santiago de Compostela
Tlf (34)678803735

redaccion@galiciapress.es o direccion@galiciapress.es
RESERVADOS TODOS OS DEREITOS. EDITADO POR POMBA PRESS,S.L.
Aviso legal Cookies Consello editorial Publicidade
Powered by Bigpress