A Xunta rexeita levar a iniciativa nas reclamacións sobre Meirás
Rueda di que se limitarán a "exercer as súas competencias". Villares reclama a fin da "impunidade" e a "rapina de guerra".
Rueda rexeita ir máis aló da xestión das visitas.
O vicepresidente da Xunta de Galicia, Alfonso Rueda, tachou de "rexeitables" as últimas afirmacións realizadas pola Fundación Franco, pero matizou que a Xunta de Galicia non ten competencias para actuar se esta organización infrinxe a Lei de Memoria Histórica.
O conselleiro relatou que as súas competencias son "garantir que a xestión do Pazo de Meirás se faga de acordo coa normativa do BIC", e que neste ámbito abriron un expediente sancionador ao entender que non se estaba cumprindo. Con todo, descartou que a Xunta poida actuar noutros aspectos.
Ante as afirmacións da Fundación Franco, remarcou que, a día de hoxe, desde a Xunta non se ten constancia de que algún partido político, institución ou organización sindical "teña trasladado algún tipo de denuncia", remarcando que "poderían facelo a quen ten a responsabilidade de ditaminar se, efectivamente, se está a infrinxir a Lei de memoria histórica e actuar en competencia". Rueda insistiu en que "a Xunta de Galicia está a exercer as súas competencias".
"RAPINA DE GUERRA"
O portavoz de En Marea, Luís Villares, pediu a fin da "impunidade" e dos "privilexios" da época do franquismo que, segundo denunciou, aínda gozan familias coma a de Francisco Franco, que obtivo o Pazo de Meirás como "rapina de guerra".
"Cremos que a recuperación da memoria histórica significa tamén a devolución e a fin dos privilexios de todos aqueles que se beneficiaron á conta do sangue e o sufrimento dos demais", manifestou o portavoz da marea galega este xoves durante o acto celebrado en Pontevedra en homenaxe a Alexandre Bóveda, político nacionalista que foi condenado á morte e fusilado polos golpistas.
Escribe o teu comentario